Лист Президента Анджея Дуды до представників нацийональных і етнічных меншын

Президент Польской Республикы Анджей Дуда 2. листопада/новембра 2018 р. передал на рукы представників нацийональных і етнічных меншын при Спільній Комісиі Уряду і Нацийональных і Етнічных Меншын лист, в котрым запрашат вшыткы меншыны, прожываючы на териториі Польщы, до спільного упамятніня 100. річниці одзысканя Польском Республиком незалежности.

11. листопада/новембра, коли в Польщы проходити будут головны упамятніня, в президентскым палаци в Варшаві передаваны будут посмертно Ордеры Білого Орла. А. Дуда і Капітула Ордеру признают іх двадцет пятьом особам, якы честно прислужыли ся для державы. Серед нагородженых находят ся члены меншын.

В писмі президент підчеркує, што єст вдячний меншынам за підтримуваня своіх традиций, через што творят загальну культуру Польщы богатшом. А. Дуда закликує до спільного святкуваня в тот ден, понеже нацийональны і етнічны меншыны сут частю Польской Республикы.

При кінци, президент передал поздрав вшыткым меншынам. Написал, што успіхы меншын сут і успіхами цільой Польской Республикы. Выразил свою вдячніст за вшытко, што меншыны робили і роблят надале для Польщы.

Серед оціненых посмертно сут члены нацийональных і реліґійных меншын. Єдным з них буде православний священник Семан Федоронько, головний капелян православного віроісповіданя Польского Войска, якій был замучений НКВД в Катыню (полну листу чытайте гев).