Мадярьскы озброєны силы веде ґенералмайор русиньского походжіня

В суботу 5-го юна 2021-го року в будапештяньскім парламенті перевзяв командованя Мадярьскых озброєных сил ґенералмайор Ромулус Русин-Сенді. Рішіньом мадярьского презідента Яноша Адера быв на тоту посаду призначеный од 3-го юна до 31-го мая 2026-го року. Інформовала о тім аґентура MTI.

Новый головный командант Мадярьскых озброєных сил ся народив 5-го мая 1973-го року в Мішколці, є доктором воєнськых наук. Як вже назначує і його призвіско, має русиньске походжіня.

Кедь в децембрі 2019-го року мадярьскы Русины зышли ся у каштелю Штефанія, што находить ся в Будапешті, на події під назвов Шедевры Русинського Умілства, на події быв участный і Ромулус Русин-Сенді. В тім часі быв бріґадным ґенералом, ведучім секретаріата Міністерства обороны.

В статі, котра пак на тоту тему вышла в часописі Русинськый світ – Ruszin Világ, чітаме, же днесь вже головный командант Мадярьскых озброєных сил має русиньске походжіня, ко чому ся він голосить, і його родічі жыють в Еделейню, малім містечку в Боршодьско-абовско-земпліньскій жупі, лем пів годины драгы од Мішколца.

Мадярьскы медії вже кінцьом мая інформовали, же презідент Янош Адер одкликав головного команданта Мадярьскых озброєных сил Ференца Корома. Міністер обороны Тібор Бенко запроновав за нового команданта ґенералмайора якраз Ромулуса Русин-Сендія.

На святочній події, котра в суботу проходила в Купольній салі парламенту, окрім іншых брали участь Янош Адер, председа влады Віктор Орбан, председа парламенту Ласло Кевер ці дакілько бывшых начальників штабів.

Жрідло фотоґрафії: napi.hu.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА