«Маґурич» зачынат од Лемковины

Не лем натура будит ся до жытя по зимовій перерві. Для декотрых орґанізаций, котры з чысто фізычных взглядів не можут діяти вчас зимовой хвилі, приходит час актывности.

Таком орґанізацийом є Стоваришыня Маґурич, якє занимат ся ремонтуваньом і консервацийом камінной сепульклярной штукы. Зима то для них час підсумувань, розрахувань, порядкуваня документациі – т.є. цілой той твз. папірьовой роботы, а робота, котра є сутю діяльности Стоваришыня, зачынат ся з приходом теплійшых днів. А же тот час уж што раз ближе, Стоваришыня Маґурич оголосило рамовий календар подій на надходячий сезон.

Першом з трьох вступні заплянуваных акций будут роботы на Лемковині – ремонт креста на холерычным цмонтері в Высові та ремонт выбраных придорожных крестів в Лоси і Новици. Тоты діяня будут проходити вчас тзв. долгого вікедну: од 30. квітня/апріля до 7 мая. Два наступны заплянуваны уж тепер таборы то: в липци/юлию (2-17.VII) ремонт нагробків на грекокатолицкым цмонтері в Старій Гуті (ґміна Нароль) на Розточы і в серпни/авґусті (31.VII – 14.VIII) ремонт нагробків в Тарнаві Нижній на Украіні і в Лісковатым (ґміна Устрикы Нижні).

Окрем того, будут проходити іщы поєдны акциі, о котрых Стоваришыня буде інформувало в своім часі.

Орґанізатор забезпечат выжывліня і спаня, часом – зворот коштів подорожы і, очывидні, сатисфакцию з соспільной роботы для захороніня камінной спадковины сепульклярной штукы ріжных наций і ріжных віросіповідань.

Контакт до орґанізатора то:
Шымон Моджеєвскій, тел.: 600-688-811 або 18-351-63-45,
szymon.modrzejewski@gmail.com