Майже міліон евр піде до словацько-польского приграніча

Майже єден міліон евр піде до словацько-польского приграніча на проєкты в области турізму. Кінцьом юна то в польскім Ряшові схвалив Комітет про малы проєкты в рамках Фонду малых проєктів Проґраму Interreg Польща – Словакія 2021 – 2027, котрого справцьом є Здружіня Еврореґіон Карпаты.

Як інформовало Одділіня комунікації Пряшівского самосправного краю (ПСК), схваленых было затля 15 малых проєктів, котрых партнерами суть і орґанізації ці інштітуції з ПСК. На словацькім боці граніці проінвестує ся майже 500 тісяч евр.

Єдным із схваленых проєктів є замір Крайского музея в Пряшові з польскыма партнерами – Окружным музейом в Новім Санчу і Окружным музейом в Ряшові, котры хотять вєдно ожывити кральовску обходну путь Via regalis.

Грошы підуть і до русиньскых реґіонів. Народный парк Полонины быв успішным жадательом в проєкті Скарбы природы і културы Выходных Карпат, місто Меджілабірці дістало схваліня на проєкт По слідах 1-ой світовой войны. Далшы проєкты має наприклад і місто Бардейов ітд.

Проєкты были схвалены в рамках першой вызвы на передкладаня малых проєктів в рамках пріоріты 3 з назвов Креатівне і турістічне приграніча. Оправданыма жадателями были з боку ПСК окресы Гуменне, Меджілабірці, Пряшів, Сабінів, Снина, Стропків, Свідник і Воронів над Топльов.

Кінцьом місяця юл будуть схвальовати ся далшы малы проєкты з той самой пріоріты, де справцьом Фонду малых проєктів є Европске зґрупованя теріторіалной співпраці ТАТРЫ. Оправданыма жадателями будуть із ПСК наприклад окресы Бардейов, Кежмарок, Левоча, Попрад, Стара Любовня.