Малый крок ґу одроджыню

Єдна з нашых найстаршых еміґрацийных орґанізаций переходит мале одроджыня. Як поінформувал Андрий Медвід, на посліднім загальным засіданю побільшыло ся чысло членів Карпаторусиньского Америцкого Центра «Lemko Hall» (Carpatho-Rusyn American Center Lemko Hall) в Йонкрес, ЗША.

Річне зобраня одбыло ся 21. мая 2023 р. «Першый раз по вельох роках приняли сме новых – штырнадцетьох членів» – реляцийонує А. Медвід, лемківскій соспільно-культурный діяч в ЗША.

На залученій до нынішнього допису знимці видно лем дакотрых з новых членів КАЦ «Lemko Hall». Сміло мож речы, што орґанізация од парох років переходит мале одроджыня. По перше зато, што по періоді коли по давным і славным «Lemko Hall» такой затерли ся сліды, середнє поколіня лемківскых діячів рішыло реактивувати діяльніст і вести орґанізацию в добрым напрямі. По другє – до орґанізациі долучают новы члены, в тым наймолодша ґенерация, яка має лемківскій рід і почуват ся до лемківского народу.

«Lemko Hall» то днес єдна з найактивнійшых лемківскых орґанізаций на східнім крайци Пілнічной Америкы. Протягом рока орґанізує ріжны подіі, на котрых стрічают ся нашы родакы, еміґранты, а і іх потомны, якы ся уж в більшости родили на американьскій земли.

Орґанізация рыхтує м.ін. традицийны пікнікы з нагоды Русаля, ци шторічный осінній «Лемківскій Кєрмеш». Члены не забывают ани і дбают о сохраніня памяти про траґічну долю лемківского народу. Приміром в минулым році лемківскы еміґрацийны кругы в Америці одзначыли 75. річницю выгнаня Лемків в рамках Акциі «Вісла». Кєд лем мают ґу тому змогу, при нагоді вшыткых тых подій, все старают ся припоминати лемківску (русиньску) історию і популяризуют культуру, котром інтересує ся штораз більше репрезентантів молодой лемківской ґенерациі в ЗША. Лемкы в ЗША вєдно з родаками в Польщы каждого рока 5. грудня/децембра святкуют Ден Русинів Польщы.

На тоту хвилю КАЦ «Lemko Hall» веде Димитрий Феленчак, по роді з Бортного (народженый в Зимній Воді к. Любіна). Нынішній «Lemko Hall» дружыт і часто орґанізує спільны ініциятивы з інчом нашом славном орґанізацийом – Лемко Союзом (The Lemko Association), якому проводит тепер др Богдан Горбаль.