Міклош оціненый в Петербурзі

Іван Міклош, словацькый економ русиньского походжіня, в суботу 18-го фебруара 2017-го року перевзяв собі в Петербурзі оцініня – Меджінародну Леонтьєвску медайлу „За вклад в редормованя економікы“ (Международная Леонтьевская медаль  „За вклад в реформирование экономики“), котра ся вручать шторічно од 2005-го року як признаня окремого вкладу до розвитку економічной наукы, вытворяня ефектівных інштітуцій троговой економікы і условій про утримательный рост. Таке оцініня має наприклад і Янош Корнай, Лешек Балцеровіч, Вацлав Клаус, Джефрі Сахс ці далшы.

Медайла Леонтьєва

О оціньованю тов медайлов у фебруарі 2005-го року із нагоды 100-ой річніці од народжіня Василя Васильовіча Леонтьєва вырішыв Общественный комітет про нагороджаня при Леонтьєвовім центрі. Согласно условіям передаваня того оцініня, медайлами оцінюють ся російскы і загранічны учены і шпеціалісты.

Василь Васильовіч Леонтьєв, по котрім має назву центер і нагорода, быв російско-америцькым економом, котрый ся народив Мніхові, в Німецьку, 5-го авґуста 1905-го року і умер 5-го фебруара 1999-го року в Ню Йорку, в Споєных штатах Америкы. В році 1973 здобыв Нобелову премію за економіку і єднако як він Нобеловов премійов были оцінены і трьоми його докторанды – Паул Самуелсон, Роберт Солов і Вернон Сміс.

Іван Міклош

Інж. Іван Міклош ся народив 2-го юна 1960-го року у Свіднику. Є словацькым економом русиньского походжіня, ку чому ся і гордо голосить. При переписі населіня у 2011-ім році на Словакії підпорив кампань, котру робили русиньскы орґанізації, жебы записати собі русиньску народность.

Почас його діяня у двох словацькых владах Микулаша Дзурінды (рр. 1998 – 2002 і 2002 – 2006) Словакія зназначіла дакілько успіхів, меджі котры належыть вступ до OECD, NATO і Европской Унії. Знамым ся став як підпредседа влады про економіку (рр. 1998 – 2002) і почас його міністрованя на міністерстві фінанцій (рр. 2002 – 2006). Під його веджіньом зробило ся много економічных реформ і Словакію в тім часі зачали называти „Татраньскым тіґром“, кідьже вдяка реформам пришли многы загранічны інвестіції і знижыла ся безробітность, чім ся Словакія зарадила міджі найскоріше роснучі економікы в Европскій унії.

В рамках партійной приналежности быв Міклош в рр. 1992 – 1993 першым підпредседом партії під назвов Občianska a demokratická únia, в рр. 1993 – 2000 быв у партії під назвов Demokratická strana, де быв єден час і председом. Од року 2001 до року 2014 быв членом партії Микулаша Дзурінды під назвов Slovenská demokratická a kresťanská únia – Demokratická strana. З партії в році 2014 одышов вєдно із Дзуріндом.

Першыраз быв міністром в роках 1991 – 1992, коли рядив Міністерство пріватізації Словацькой републікы. В рр. 1998 – 2002 быв підпредседом влады про економіку. В роках 2002 аж 2006 быв підпредседом влады і міністром фінанцій, таку саму функцію мав потім і у владі Іветы Радічовой в рр. 2010 аж 2012.

Окрім того быв ґубернатором Світовой банкы за Словакію (1998 – 2002), ґувернером Міджінародного валутового фонду за Словакію (2002 – 2006), ґувернером Европской банкы про обнову і розвой за Словакію (2002 . 2006) і членом Рады міністрів фінанцій Европской унії – ECOFIN (2003 – 2006).

Моменталном робить порадцю україньской влады при міністерстві фінанцій. На Словакії робить в інштітуції M.E.S.A. 10 – Центер про економічны і соціалны аналізы, што є  єкономічный think-tank, котрый діє як незалежна, невладна і безпрофітова орґанізація. Головным цільом той орґанізації є підпора свободной торговой економікы, прінціпів і вартостей як є свободный конкурз, рівность шанцей, свободне подниканя, обмеджена роль державы, одкрытость економікы, одділіня економічной і політічной моци.

Іван Міклош быв у 2004-ім році признаный лондоньскым журналом Euromoney за найліпшого міністра фінанцій на світі.

Жрідло фотоґрафій: Facebook – Ivan Mikloš.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА