Голосник

Мож уж зголошувати кандидатів до преміі за охорону деревяных памяток архітектуры

Через цілый місяц, до 20. марця 2020 р. мож зголашати кандидатів до нагоды ім. Марияна Корнецкого, котра єст признавана Малополськым Воєвідством для осіб, якы мают вклад в охорону памяток деревяной архітектуры.

Зголошыня до преміі можут давати капітула нагороды, окремы інституциі, стоваришыня, позаурядовы орґанізациі, університеты, конфесийны звязкы, самоурядовы єдиниці ци ізбы ґрупуючы консерваторів памяток.

Основны критериі

Нагорода ім. Корнецкого была схвалена зато, жебы вказувати на люди, котры істо старают ся о деревяны памяткы архітекруты, якы сут локуваны в малопольскым воєвідстві. Тот реґіон Польщы, за справом етноґрафічных обставин і выступуваню ріжных нацийональных і етнічных ґруп, єст богатый в деревяны памяткы архітектуры.

Пореможця отримує фінансову нагороду 15 тис. зл. Єст она признавана напр. за дбаня о деревяны обєкты, іх утриманя, як і належыте хоснуваня. Капітула зверат увагу і на дальшы критериі, а то адаптацию обєктів до новых функций, ведіня консерваторскых прац, досліджыня і документация деревяных памяток архітектуры, котры мают высоку вартіст для культуры. Серед критерий находят ся і інчы, на котры детально позерат каждый рік капітула.

Зголошыня приминат Департамент Культуры, Нацийональной Спадковины і Промоциі Маршальківского Уряду Малопольского Воєвідства. Лавреат буде оголошеный в маю вчас тогорічной едициі Малопольскых Дни Нацийональной Спадковины.

Оцініня і за лемківскы памяткы

Капітула нагороды ім. Корнецкого нагороджат опікунів, провідників і парохів памятковых святынь. За охорону лемківскых обєктів дотля доціненый был парох ганчівской церкви – о. Володислав Канюк, ци о. Mирослав Цідило, як опікун памятковых обєктів, входячых в склад бортняньской парохіі. О. М. Цідило достереженый был за ремонт і адаптацию будинку старой плебаніі на Парохіяльный Історично-Природничый Музей і проведіня консерваторскых і реставраторскых робіт трьох церкви: в Бортным, Бодаках і Волівци. О. Канюка доцінено за опіку над пятьома храмами, якыма завідувал через 20 остатніх років, будучы настоятельом ріжных парохій, особливо за выремонтуваня церкви Покровы Пресвятой Богородиці в Ганчовій.

В маю 2019 р. оцініня за опіку над храмом св. Параскєвы в Квятони отримал Ян Гыра, долголітній провідник по тій церкви і єй популяризатор.

фот. Каміль Палюшек, церков в Розтоках (Розтока Велика)

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі