«Мушынянка» Леґнавянaм на здоровля

Польскій порталь «Пульс бізнесу» приносит інформацию про інвестицию в русиньскым селі Леґнава, положеным по словацкым боку Карпатской Руси, котру зробила кооператыва «Мушынянка» – продуцент знаной на польскым рынку мінеральной воды. Леґнаву од Мушыны розділят лем ріка Попрад, а з другого боку – лем вершок.

Роботы польского інвестора в Леґнаві тырвали три рокы, забезпечыли документацию і вывертіли доступ до джерел. В липци/юлию минулого рока, фірма подала вшыткы документы, котры были потрібны до отриманя словацкой концесиі на черпаня мінеральной воды і передаваня єй рурами через Попрад на польску сторону. Рішыня в тій справі долго ся тягало, а вмеджечасі змінила ся устава Словацкой Республикы. Тепер є неможливе, жебы експортувати воду з теренів Словациі рурами за границю. Каждий продуцент воды мал бы поставити інсталяцию до розливаня і фляшкуваня воды одраз в тым місци, де єй добыват. Адже фірма з Мушыны мала бы старати ся забезпечыти інсталяцию розливаня воды одраз в селі Леґнава. Як поясняют передставникы польской фірмы, така інсталяция в русиньскым селі не мат економічного смыслу зато, же зараз за Попрадом, по польскій стороні є побудувана головна інсталяция до фляшкуваня «Мушынянкы».

Польска фірма скаржыт до Европейской Комісиі рішыня словацкых власти. «Ґазета Выборча» пише о можливым порушыню Словацийом основного трактату Европейского Союзу і ограничаная свобідного гандлю.

Будеме інформувати, ци і Леґнавяне будут мати хосен з польского бізнесу. Ци сотворены будут новы місця працы на пряшівскым боку Попраду.