На граді в Старій Любовні стрітять ся потомкове маїтелів

На Любовняньскім граді у четверь 28-го юла 2022-го року стрітять ся потомкове трьох шлахтічных родів, котры в минулости град властнили.

Директор Любовняньского музея, під котрый град належыть, Далібор Микулик про аґентуру TASR потвердив, же то про них велика подія, а нелем реґіоналного, але і цілоевропского значіня, кедьже дотеперь така стріча ниґда не подарила ся зорґанізовати.

„Конкретно іде о Любомірьскых, котры властнили град в роках 1593 аж 1745, од них бы мав прийти Ян Любомірьскый-Ланцкороньскый з Варшавы. Пак суть то Раісовы, котры властнили град у 19-ім столітю, по мечі бы мав прийти потомок Дьордь VI. Любловарі Раіс, котрый жыє в Мадярьску. Остатнім представительом буде внук прінцезны Ізабелы і Яна Замойского, котры властнили град на переломі 19-го і 20-го столітя аж до 1944-го року, Йозеф Михал Замойскый прийде із Мадріду,“ приближыв Микулик з тым, же вшыткы трьоми стрітять ся пополідне в Крішталовій комнаті Палаца Любомірьскых.

Тоты три фамелії подля Микулика не овпливньовали лем історію реґіону северного Спіша, діяли і в Іспанії, на Сіцілії, Любомірьскы мали палаці і в Дресдені, Відню ці Празі.

„Ідею зорґанізовати тоту стрічу маю вже десять років, но в остатнім часі нам то все штось перервало. Теперь вже маєме потверджено, же у четверь прийдуть вшыткы,“ додав директор Любовняньского музея.

В рамках стрічі потомкове уложать на граді часову скринку з памятныма предметами, одбуде ся і омша в градній каплічці, і в западнім бастіоні заграють собі шахы із жывыма фіґурками.

„Буде і машкарный бал, градны славности, ночна переглядка, але основный є тот історічный момент, мати їх ту вшыткых на єднім місці, што є выняткове в рамках европскых градів і замків,“ повів директор з тым, же подія одбуде ся в рамках проєкту УЗЕЛ  Стара Любовня – Місто културы 2021.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА