На ліґницку церков вернул крест

Як інформувала грекокатолицка парохія Успінія Пресвятой Богородиці в Ліґници, 13. мая на головну баню храму вернул крест. Скорше, в неділю, 10. мая одбыло ся його торжественне посвячыня. Процес рыхтуваня до ремонту даху та одновліня креста тырвал пару місяців.

Крест был вісем місяців тому вкраденый і знищеный через, днес уж покараного, злодія. Припомнийме, што метальовый крест был вкраденый 13. вересня/септембра 2025 р., а подальше знищеный, потятый на кавальці.

«13. мая 2026 рока стал історичным дньом для нашой парафіяльной спільноты Успіня Пресвятой Богородиці. На головну баню храму было наново встановлено одреставруваный крест» – пише ся на сайті ліґницкой парохіі. Одраз по тым ліґницка прокуратура зачала слідство, котре довело до затриманя єдной особы. Од самого початку слідчых інтересували мотивы знищыня креста, ци не было тото спричынене ненавистю на реліґійным або нацийональным фоні.

В ден, коли дошло до крадежы, в Польщы перебывал блаженнійшый Святослав (Шевчук), верховный архієпископ Кыівско-Галицкій, голова Украіньской Грекокатолицкой Церкви. На вечер 13. вересня/септембра одправил в ліґницкым храмі при участи дальшых єрархів богослужыня.

Остаточно злодійом креста был 30-літній мужчына. Ліґницкій Районовый Суд в першій інстанциі засудил го на три рокы вязниці. Шкоды, якы повстали в наслідстві його діянь, оцінено на кількасот тисячів злотыx, а сам чын выкликал великє обуріня серед вірных. Окрем того справця одповідал і за інчы крадежы та нищыня маєтку, в тым інфраструктуры желізниці. Суд узнал, што кара трьох років є адекватна до характеру злочынів.

фот. грекокатолицка парохія в Ліґници