На річніцю Токаїцькой траґедії пришов і презідент

В пятніцю 22-го новембра 2024-го року проходила в селі Токаїк пєтна подія з нагоды 80-ой річніці Токаїцькой траґедії. На події брали участь і представителі державы ці Пряшівского самосправного краю.

До Токаїка пришов жертвы націстів припомянути собі презідент Словацькой републікы Петер Пеллеґріні. Окрім нього были участны і далшы представителі державной справы ці Пряшівского самосправного краю, меджі нима міністер інвестіцій, реґіоналного розвитку і інформатізації Ріхард Раші вєдно із державным секретарьом того резорту Михлом Калиняком, міністер внутрішніх справ Матуш Шутай Ешток ці председа Пряшівского самосправного краю Мілан Маєрьскый.

Вірю, же річніцю закінчіня войны одсвяткуєме достойно

Скламаня людей, фрустрація і поларізоване общество, траплене конфліктами і ненавистьов – то ідеално добра земля про зновузроджіня тоталітных режімів в будьякій подобі і будьде на світі, повів почас пєтного акту в Токаїку презідент Пеллеґріні.

„Хоць фашізм потерпив прогру, не значіть то, же бы минула грозьба його навернутя,“ підкреслив презідент.

„Тот рік припоминаме собі 80-ту річніцю Словацького народного повстаня, і в слідуючім році припомянеме собі 80-ту річніцю кінця Другой світовой войны. Вірю, же собі то припомянеме достойно і з одповіднов почливостьов ку десяткам міліонів жертв войнового убиваня. Навеце, хочу вірити тому, же в тім часі уж не будеме конфронтованы з войнов в нашім безпосереднім сусідьстві,“ повів голова Словацькой републікы.

За словами презідента є справды траґедійов, же в 21-ім столітю суть люди в Европі свідками войновых стархів, атак на цівілне населіня.

Треба припоминати собі історічны дії

Старостка села Токаїк Яна Медвецова підкреслила важность припоминати собі історічны дії. „Нащастя є ту людьска память, свідоцтва тых, котры пережыли, свідоцтва їх близкых, родины і приятелів. То ґаранція, же розкрываня правды і минулости не буде покривлене,“ повіла в приговорі.

Подія проходила при памятнику під назвов Навернутя до выгулбеного села од русиньского скулптора Франтішка Ґібалы. Памятник недавно перешов реконштрукційов, кедже быв пошкодженый при землетрясіню восени 2023-го року.

Фото: FB/Алена Новакова.