На словацькім і польскім боці обновлять далшы турістічно експонованы драгы

Пряшівскый самосправный край (ПСК) зреалізує далшы вызначны проєкты на драгах вдяка черезгранічній співпраці Interreg. Новый асфалт буде спаяти приграніча Выходных Карпат, Вышній Шаріш з Мушынов, як і приграніча через Дуклю.

Ренововати ся так само буде далша часть в Пєниньскых народных парках, конкретно в селі Камюнка. Цілково перейде реноваційов в ПСК коло 10 км драг за майже 7,2 міліонів евр. Інформовала о тім Леа Леготьска з Одділіня комунікації Канцеларії председы ПСК.

Комітет моніторованя Проґраму черегранічной співпраці Interreg Словакія – Польща 2021 – 2027 недавно вырішыв о схваліню, а тым і о реалізації далшых штирьох сполочных проєктів Справы і утримованя драг Пряшівского самосправного краю і польскых партнерів.  Драга буде ся робити наприклад і в Малій Поляні або перед селом Ваґринець.

„В проґрамі Interreg знова были сьме успішны і здобыли понад 7 міліонів евр, причім наша Справа і утримованя драг была успішна в штирьох із шестьох проєктів,“ повів Мілан Маєрьскый, председа ПСК.

„То доказ, же сьме досправды барз добрі приготовлены повнити заміры, котры сьме собі в повязаню з нашым крайом і його розвитком дали,“ доповнив пряшівскый жупан з тым, же актуално схвалены проєкты выліпшать параметры черезгранічных споїнь, котры суть вступнов бранов до народных парків і природных локаліт. „Прямо тым зліпшыме доступность, а непрямо і навщівность веце локаліт нашых реґіонів.“

Фінанчно найвекшый черезгранічный проєкт, котрый буде ся реалізовати в Пряшівскім краю і в Підкарпатьскім воєводстві, має назву Спаяме приграніча Выходных Карпат. Його цілкова сума є майже 5 міліонів евр, з того на словацькім боці проінвестує ся 2,8 міліона евр. Змодернізує ся за них драга за селом Гавай по Малу Поляну.

ПСК і Підкаратьске воєводство будуть реалізовати і проєкт Спаяме приграніча через Дуклю в цілковій сумі 4,6 міліона евр. В ПСК то уможнить реконштруцкію двох драг. Обнова почне перед селом Ваґринець а закінчіть ся на граніці окресу Свідник – Стропків.

Продовжовати ся буде і в далшых драгах в Пєнинах. В штириміліоновім проєкті Модернізація драгового споїня Пєниньскых народных парків ся буде робити наприклад драга в Камюнці.

Реновованы будуть і драгы на Вышнім Шаріші в околіці Мушыны, і то вдяка проєкту ПСК з Мушынов під назвов Спаяме Вышній Шаріш з Мушынов за 3,8 міліона евр. В рамках нього буде робити ся наприклад драга, котра іде ку гранічному переходу Чірч – Лелюхів.