Голосник

На верьшку Скоры бы міг выникнути памятник. Треба фінанції

На верьшку Скоры, котрый находить ся коло русиньского села Гостовиці, Сниньского окресу, де почас Першой світовой войны проходили тяжкы битвы, бы міг ку вже існуючій дзвоніці прибыти централный памятник присвяченый воякам з теріторії днешньой Словакії.

Як аґентуру TASR інформовала выконна директорка Областной орґанізації турістічного руху Вышній Земплін і Вышній Шаріш Михаела Здражілова, бракують на то фінанції. Місце на верьшку Скоры є подля ньой єднов з мало локаліт на Словакії, де почас Першой світовой войны бойовали вояци з теріторії днешньой Словакії.

Забыты вояци

Якраз зато подля Мартіна Дробняка із Клубу воєньской історії Бескіды выникла ідея збудовати на тім місці памятник воякам, котры походили з теріторії Словакії і бойовали на фронтах Першой світовой войны.

„Было їх понад 400 тісяч, і 70 тісяч з них вмерло у войні, но парадоксно не мають жадного централного памятника. Цалком ся на них забыло,“ повів Дробняк.

На Словакії за його словами не є родины, котрой предок бы не бойовав на бойовых полях Першой світовой войны. „Збудованьом памятника хочеме припомянути забыту смутну історію тісячів нашых предків, котры наруковали до австро-угорьской армії і змололи іх траґічны дії Першой світовой войны,“ доповнив.

План на 15 памятників, бракують грошы

В плані мають збудовати мінімално 15 памятників у круговій композіції. „Памятник быв мав творити камяный підставець, масівный деревяный стовп, котрого частьов бы быв полковный одзначок конкретной воєньской єдиніці, і голова стовпу іншпірована шаховыма фіґурами бы представльовала тіп баталіону – піхота, кавалерія, артілерія, технічна підпора,“ приближыв візію Дробняк.

Проєкт ареалу є готовый, моментално є Клуб воєньской історії Бескіды в штадію гляданя фінанцій. Подля Дробняка бы єднов з можливостей была співпраца самосправных країв, в тім припаді бы ся дало на памятнику ідентіфіковати, в котрім баталіоні войовали вояци з конкретного краю.

На верьшку Скоры вже од 2016-го року стоїть деревяна дзвоніця, котра має 6 метрів, і ку котрій веде научна стежка з інформачныма таблічками. Стежка має довєдна 13 кілометрів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі