Надія на охорону найкрасшых долин Лемковины

Стоваришыня Долины, якє зосереджат люди, котрым на серци є охорона природы і зрівноваженого бытуваня, бытя в долинах сел Радоцина, Чорне, Незнайова, Долгє і Липна, але тіж захованя культурового богатства по мешканцях – міцно залюдненых іщы до часів войны – сел, поінформувало о результатах стрічы з директором Реґіональной Дирекциі Державных Лісів Пьотром Кемпфом. Єст надія на основаня гын резервату природы.

Перед тыжньом, 10. квітня/апріля тр. директор Реґіональной Дирекциі Державных Лісів Пьотр Кемпф принял запрошыня соспільной ґрупы охороны долины Вислокы і приіхал до Радоцины, жебы в терені омовити проблемы той обшыри.

На стрічы присутный был тіж лісничый Анджей Пікор, а зо страны активістів м.ін. представничкы Стоваришыня Долины Мария Стажевска, Мария Стшелецка, Малґожата Добжыцка, Анна Трейт з Працовні для Вшыткых Істот, Малґожата Ґурска з Загальнопольского Товариства Охороны Птахів, Юстина Новак з Фундациі ТоПоле, Славомир Спрінґер з Фундациі Аеріс та пару інчых осіб. Так велика репрезентация орґанізаций і стоваришынь вказує, як цінна і важна є обшыр, котру треба хоронити.

На добрій дорозі до резервату…

Вчас пятгодинной стрічы омовленых было пару квестий. Медже нима нашла ся думка основаня резервату Джерела Вислокы в особливо цінных лісах Лісництва Радоцина. Реґіональна Дирекция Державных Лісів має опрацувати концепцию резервату.

Стріча в терені была консеквенцийом стрічы, котра прошла 25. марця в Кракові в сідибі Реґіональной Дирекциі Державных Лісів. Были гын репрезентанты природничых орґанізаций, науковых інституций, а тіж посланка Дария Ґосек-Попіолек. Бесіда тыкала охороны найціннійшых природничо місц в Малопольщы та векшой партиципациі соспільной страны і жытелів в рішынях тыкаючых лісів. «Барз вельо місця занял Низкій Бескід, а особливо пят долин важных для нашого стоваришыня – Радоцина, Чорне, Незнайова, Долгє і Липна» – подає на своім фанпейджы Стоваришыня Долины. «Представили сме проблем пошырюючой ся інфраструктуры в серци Низкого Бескіду і загорозы, котру несе для природы, зрівноваженой туристикы і краєвиду» – пишут.

Позитивным наслідством стрічы в терені з директором Кемпфом є факт, што Еко-Парк Радоцина не єст уж веце освітляный вночы, што не буде спричыняло занечыщаня неба штучным світлом. Є то о тілько важне, што подля посліднього рапорту Центра Космічных Бадань Польской Академіі Наук і Light Pollution Think Tank натуральні нічне небо над Польщом уж не выступує. 58% жытелів Польщы не ма можливости достеречы Молочной Пути, а для 20% популяциі державы нічне небо єст так ясне, же іх зріня цілу добу остає в денным режімі. Ґміны, над котрыма нічне небо є найтемнійше, то самы бєщадскы ґміны, а то: Лютовиска, Тисна і Чарна. В першій десятці є іщы ґміна Команча.

«Тема Еко-Парку в Радоцині буде зо страны директора РДДЛ анализувана в контексті будучности його мериторичного проґраму. Нашым постулятом є, жебы тото місце было хоснуване до всестранной едукациі рыхтуваной з соспільным орґанізациями і незалежныма едукаторами» – подало по стрічы Стоваришыня Долины.

Як дале реферуют, Державны Лісы не плянуют дальшой розбудовы дороговой інфраструктуры ани фінансового підпертя самоурядовых інвестиций того рода. Решта доріг удоступнена до публичного хоснуваня буде утримувана в стандарді шутровых доріг.

«Aбсолютні выняткове місце»

«Директор Кемпф згодил ся з соспільном страном, што треба протидіяти загорозам, котры можут неґативні влияти на вынятковіст того місця. За великій рух авт з великом скорістю та розвиток масовой (популярной) туристикы то ключовы загорозы для спійности візиі туристикы і рекреациі типу SLOW в тым реґіоні» – арґументує Стоваришыня.

Што буде дале? Директор Пьотр Кемпф поінформувал, што протягом двох місяців плянує дальшу візиту в Радоцині і товды буде хотіл одповісти на рішены квестиі тыкаючы плянуваного резервату в обшыри Выжньой Радоцины, лісів обнятых мораторийом та проґраму Еко-Парку. Дирекотр потвердил тіж дальшы стрічы в сідибі РДДЛ в Кракові, котры тыкати будут найціннійшых лісів і пропонуваных резерватів в поділом на поєдны надлісництва.

«Дякую (…) цілій заанґажуваній ґрупі, што вказали сте мі тото абсолютні выняткове місце. Напрям маме єден – як найскорше резерват природы Джерела Вислокы» – написал на своім офіцийным профіли на сіти Facebook Пьотр Кемпф по візиті на Лемковині.

Фот. Stowarzyszenie Doliny