«Народово-реліґійны квестиі в Малопольщы в роках 1918-1939» – конференция

В найблизшу суботу, 17. жолтня/окробта, в Мычковцях – попри ІХ Екуменічных Стрічах – буде проходила наукова сесия під назвом «Народово-реліґійны квестиі в Малопольщы в роках 1918-1939».

В проґрамі конференциі находят ся выступліня:

• Віроісповіданя і обряды етнічных ґруп в Малопольщы меджевоєнного періоду – о. проф. Станіслав Набиванєц, Ряшівскій Університет,
• Соспільно-народовы і реліґійны проблемы в реляциях львівскых митрополитів архієпископів Юзефа Більчевского і Андрия Шептыцкого – о. проф. Юзеф Волчаньскій, Папскій Університет Яна Павла ІІ з Кракова,
• Польскокатолицкій Костел в Малопольщы меджевоєнного періоду – о. Анджей Пастушек, парафія польскокатолицкого костелела в Бажанівці,
• Ромска соспільніст на польско-словацкым пограничы в меджевоєнным періоді – др Петер Кудрац, ведучий Стоваришыня Ром Подскалькі зо Словациі
• Народины і розвиток украіньского нацийоналізму – Артур Брожыняк, Інститут Нацийональной Памяти,
• Теперішніст в Бєщадах, значыт о спілістнуваню на культуровым пограничы – Анджей Потоцкій.

Окрем конференциі, в проґрамі ІХ Екуменічных Стіч сут іщы богослужыня і концерт ґрупы Романе Анєля зо Словациі. Початок о 9.00 год. Орґанізаторам Стріч єст Выпочынково-Регабілітацийний Осередок в Мычковцях і Католицкє Стоваришыня Civitas Christiana Округ в Ряшові.