Нашы лідеры – Лемковина, Братислава, Підкарпатска Русь, штат Ню Йорк і Москва

Непрестанна борба о кількіст входів на lem.fm веде ся в поєдных державах. Представляме статистыкы популярности нашого порталю подля першой пяткы.

Польща

Ту одраз видиме лідера (вшыткы даны за Google Analytics), бо темносинім кольором зазначене перше місце. Тот результат мож было передвидіти, бо і Лемковина, і Краків (як академіцкій осередок для вельох Лемків) то міцны лемківскы пункты на мапі Польщы. Малопольскє воєвідство то ок. 42% вшыткых входів з Польщы, але і чужына мат добре другє місце.

Словация

Русины з полудньовой страны Карпат, котры іщы не выіхали з Пряшівской Руси, плянуючы оселити ся в Братиславі і тоты, што уж там жыют, борют ся о перше місце. Тепер выгрыват Братислава (місто + підбратиславскы окресы), котра заберат 34% входів, але чує на плечах дых Пряшівского Краю. Хоснувателі зо Словациі і так выгрывают двараз – 3 каналы радия лем.фм можете слухати не лем через інтернет, але і через цифрову мультімедияльну плятформу Антік, котра находит ся в неєдній русиньскій хыжы.

Украіна

Борба о перше місце в катеґориі “Входы на порталь lem.fm в 2015 р.” веде ся штоден. Рано, пополудньом і вночы. Тепер выгрыват Підкарпатска Русь (звана днес Закарпатском Областю), але кєд даякій хоснуватель з Львівской Области, або міста Кыів приснул бы за компутером і опадаючом на клявіятуру головом влучыл бы наш порталь, хоц-як могло бы быти з лідеруваньом і результатом 22% для Підкарпатской Руси.

ЗША

Мапа входів на порталь lem.fm в Зъєднаных Штатах Америкы то інакше мапа дестинаций русиньской еміґрациі, котра зачала ся  в ІІ пол. ХІХ ст. Хоц чытают нас і на Алясці, то найбільше любителів маме в східній части державы. Почестне перше місце занимат штат Ню Йорк – 32%, але пенсильваньскы хоснувателі уж ся скликуют, жебы зробити сой подарок на Різдвяны Свята в виді выграного бою з Ню Йорком о перше місце. До свят іщы остало кус часу, а в Америці вшытко єст можливе!

Росия

Фурт збільшаюча ся популярніст порталю lem.fm в Росиі нас тішыт, але і заскакує. Почестне пяте місце на листі входів, то, по правді, несподіванка. Тым більше ґратулюєме Москві (само місто), котра з результатом 30% (хоц Самара і Санкт Петерсбурґ женут за столицьом, аж ся курит) выгрыват борбу посеред росийскых хоснувателів, котрых, рахуючы рік до рока, прибыват найбільше.

ДЯКУЄМЕ красні вшыткым хоснувателям порталю lem.fm!