Не дали нам, то самы збереме і выдаме

Здавало бы ся, што штораз меньше маме пертя до чытаня хоц чого, до познаваня того, што ся уж давно забыло в народі, до досліджаня. А єст наоборот. Хочеме познавати.

Тым разом захотіло ся познати лемківску кухню. Лем жебы єй познати і самому спрібувати дашто зварити, треба зобрати гідні грошів на выданя комплексовой лемківской кухарской книгы.

Было бы тому інакше, значыт не мусіли бы сме ся аж так старати, кєд бы нас власти в Варшаві почули і доцінили. Є інакше, але ци мусиме плакати над розляным молоком?

Збераме, ґрайцар до ґрайцара

Перед даякым часом явили ся результаты оціны внесків, якы зголошены были меншыновыма орґанізациями. На жаль, внесок зложеный Стоваришыньом «Руска Бурса» в Ґорлицях міністерияльны власти нияк не доцінили і зохабили до шуфляды.

Кєд ся о тым дознали шырше самы заінтересуваны – лемківскы громадяне Польщы, рішыли спротивити ся рішыням Міністра Внутрішніх Справ і Адміністрациі і оголосили збірку грошы, за якы годны будеме выдати лемківску кухарску книгу.

«Такого на выдавничым рынку іщы неє, але барз хочеме, жебы было, і як сме чули, Вы так само хочете», пише ся на початку опису збіркы на сайті zrzutka.pl. Книжка тота має находити в собі провірены рецептуры лемківской кухні – такой, яку знали нашы бабы, а на якій выкормили ся вшыткы поколіня.

Автентик

Книжка буде поділена на 8 части: «Стравы з мукы», «Стравы з капусты», «Молочны стравы», «Стравы з комперями», «Стравы зо сыра і сыроваткы», «Додаткы», «Солодкє» та «Інчы». Разом представленых буде 70 провіреных ориґінальных рецептур, што сут оддзеркаліньом традицийной лемківской кухні.

Рецептуры были зобраны в часі тырваючых вельо років тереновых бадань (бесід з жытелями лемківскых сел в Польщы і з особами, якы были выселены на Украіну) та досліджынь в бібліотеках. Тоту роботу зробила Едита Вільк, любителька лемківской кухні і культуры, в рамках ліценциятской розправы писаной на напрямі Новы медиі, рекляма і сучасна культура ДВПШ в Саноку під опіком др Анны Худзік. Едита наштоден робит в редакциі «Саноцкого Тыжденника», єст амбасадорком Фундациі DKMS, а од парох років спілтворит тіж Фестіваль Фольковиско.

Выданя, хоц окрислене як книжка, буде істинном кухарском книгом, кєд же буде рахувала коло 160 стран формату А4 (з великым чыслом знимок), выдрукувана буде на красным, непокрытым папері (грубости 120 ґ), в твердій окладинці, з басанунком до зазначаня.

Кєд хочете спрібувати своіх кухарскых знань уж тепер, пару приміровых рецептур найдете на сайті zapaska.pl, якій веде як раз Едита Вільк.

Нагороды

Орґанізатор збіркы – Стоваришыня «Руска Бурса» в Ґорлицях – про тых, што хотят одраз мати заґарантуване, же отримают примірникы книжкы, зрыхтувал специяльны нагороды.

То пару опций, но три з них односят ся до плянуваного выданя. Перша з них односит ся до e-bookа. Кєд вплатите мінімально 39 зл – отримате електринічну версию выданя. Кєд зас додате кус веце, і вплатите 54 зл, то до вашых рук приде выдрукувана лемківска кухарска книжка. Кєд заплатите тото мінімальне 59 зл, то отримате дві версиі – папірьову та електронічну.

При дальшых опциях можете отримати окрем самой книжкы тіж інчы выданя Стоваришыня Руска Бурса, такы як цедечка ци оповіданя для діти.

Нагороды можете одобрати особисто в Рускій Бурсі в Ґорлицях, а за высылку мусите на жаль заплатити уж самы, кєд же ціла ініциятива орґанізувана єст соспільно, без фінансовой підпоры урядів і інституций.