Недільне землетрясіня в Креници было чути і під Бардийовом!

В ночы з минулой неділі нa понедільок в Креници і околицях зас затрясла ся земля. Землетрясіня было чути двараз. Найперше по 23.00 год. в недільний вечер, пак над раном в понедільок ок. 4.00 год. мож было почути другє.

Як бесідує Андрий Трохановскій, шеф ансамблю Терочка, діючого при Рускій Бурсі, і жытель Крениці: – Тілько, што люг єм спати. По 23.00 год. почул єм міцне вдаріня, як бы над повалом, поверх выже, на підлогу в єдным моменті скочыло парудесят осіб нараз. Тырвало тото недолго, може пару секунд. Другого трясіня єм не чул. – Локальны медиі цитуют бургомайстра Крениці, др. Дариюша Реська, котрий пізным вечером іщы сідил перед компутером і не одраз асоциювал гук, котрий почул, з землетрясіньом.

На другій ден, коли інформация розышла ся по околици, бургомайстер контактувал ся з експертами-сейсмолоґами з Польской Академіі Наук – перше землетрясіня мало маґнітуду 2,9, а другє 2,7. Трясіня было чути не лем в Креници, Мушыні і поблизкых селах, але – як подают словацкы медиі – і по другій страні Карпат м.ін. в русиньскых селах в сторону Бардийова. Порталь tvnoviny.sk приносит вісти, же земля трясла ся в Мальцові, Кружльові, Ґерляхові, Свіржові, Ґаболтові і ін.

Крениця являт ся дост активном – як на тоту ґеоґрафічну обшыр – сейсмічном зоном. Посліднє землетрясіня з маґнітудом 2,0 мож ту было чути в 2009 році, але жытелям найбарже ся запамятало дуже міцнійше з 1992 рока – земля трясла ся товды парураз, в тым найсильнійше з маґнітудом аж 4,0. Як подают експерты, тот кавальчык Карпат (а тіж Підгаля) єст найактивнійшом сейсмічні обшырю в мало активным тектонічно ареалі.