Неє згоды, жебы одобрати выборчу привілегію меншынам

Солідарна Польща хотіла одобрати выборчу привілегію меншынам. Віцеміністер рільництва і єдночасно опольскій посол Солідарной Польщы Януш Ковальскій зложыл поправку до новелизациі Выборчого кодексу, жебы выкрислити привілегію для нацийональных і етнічных меншын, котры не мусят перекрочыти в скали державы 5-процентового выборчого порога. Поправка пропала.

Перед тыжньом, в четвер 26. січня/януара проходило другє чытаня новелизациі Выборчого кодексу. Товды тіж віцеміністер рільництва Януш Ковальскій зложыл в імени посланців Солідарной Польщы поправку. Цілю было предовшыткым унеможливити вхід до сойму представникам німецкой меншыны. Рух тот посол Ковальскій заповідал іщы в листопаді/новембрі минулого рока вчас пресовой конференциі в Соймі.

Посол Ковальскій не згаджат ся на «привілегію німецкой меншыны»

Выборчы комітеты нацийональных меншын не мусят перекрочыти в скали державы 5-процентового выборчого порога. Реґулює то 197 арт. Выборчого кодексу. Од 2007 р. німецка меншына, як єдина має свого преставника в соймі, є ним Рышард Ґалля. Найвеце, аж пятеро, выбороли в 1991 р. В наступній каденциі мала трьох, а в дальшых двох каденциях – по двох.

Віцеміністер Ковальскій хотіл, жебы – так як вшыткы інчы комітеты – меншыны мусіли в цілій Польщы здобыти найменше 5-процентове попертя, жебы мати своіх представників в Соймі. Поправку, котру зложыл, підписало 20 посланців Солідарной Польщы.

«То цілковито неконституцийна привілегія німецкой меншыны. В практиці привілегія в 197 арт. Выборчого кодексу діє не на хосен меншын як такых, але єдной меншыны – німецкой, бо решта з огляду на чысленніст населіня і політичну ґеоґрафію не може корыстати з той привілегіі» – написано в поясніню до введіня поправкы.

Привілегія вшыткых меншын

«Неє ниякой привілегіі в Выборчым кодексі для німецкой меншыны. То привілегія вшыткых комітетів твореных нацийональныма і етнічныма меншынами» – пояснял посол німецкой меншыны Рышард Ґалля, єдиный в Соймі представник нацийональной меншыны в Польщы.

Як підкрислял посол Ґалля, звілнія з вымогу перекрочыня 5-процентового выборчого порога то примір позитивной дискримінациі, або – інакше бесідуючы – вырівнавчой. З заложыня тыкат меншын, котры поріг старту мают найчастійше низшый нич інчы комітеты.

«Признаня нацийональным меншынам выборчой привілегіі є ознаком дозрілости демокрациі. Польска держава през веце як 30 років хоснує тот принцип, одтале моя присутніст в Соймі» – констатувал посол Ґалля.

Інчы европейскы державы, в котрых меншыны мают выборчы привілегіі, то м.ін. Данія, Румунія, Італия, Німці ци Хорвация.