В комунікаті Апостольского Нунция в Польщы з дня 25. листопада/новембра 2020 р. поінформувано, же покликана была на териториі Польской Республикы нова грекокатолицка єпархія. То ольштыньско-ґданьска єпархія Украіньской Грекокатолицкой Церкви (УГКЦ), котра свойом обшырю обняла пілнічно-східню Польщу. Оголошеный был і выбір нового владыкы. Остал ним о. Аркадий Трохановскій.
Папа Франциск тым поблагословил рішыня Синоду Єпископів УГКЦ што до покликаня новой, третьой грекокатолицкой єпархіі на териториі Польщы. Ольштыньско-ґданьска єпархія створена была з части дотеперішньой перемышльско-варшавской архієпархіі і вроцлавско-ґданьской єпархіі УГКЦ в Польщы. Обшыр новой єпархіі обнимат териториі митрополий латиньского Костела, тє. варміньской, ґданьской, білостоцкой і плоцкой єпархіі з варшавской митрополиі.
Нунциятура проголосила і рішыня Ватикану што до призначыня за владыку номінанта новой єпархіі о. Аркадия Трохановского, дотеперішнього пароха в Валчы в старій вроцлавско-ґданьскій єпархіі. Новый владыка має лемківскє коріня.
В комунікаті Апостольского Нунция пише ся, што до часу канонічного обнятя єпархіі через номінанта, заряджал єпархійом як адміністратор буде митрополита перемышльско-варшавскій, архієпископ Євгеній Попович. Катедром новой єпархіі буде місто Ольштын на Варміі.
На обшыри новоствореной єпархіі, подібні як і в цілій УГКЦ в Польщы, вірныма поєдных парохій окрем Украінців сут так само Лемкы.
фот. www.cerkiew.org
Коментарі