Новий Рік, новы задачы, новы пляны ЛЕМ.фм

Дорогы чытачы порталю і слухачы радия ЛЕМ.фм,

З нагоды Різдвяных Свят і Нового 2016 Рока, желам Вам вшыткого доброго! Нашы діяня і робота єст для Вас і лем завдякы Вашому заінтересуваню можеме ся розвивати.

Барз дякую тіж за рік тяжкой і хосенной роботы редакцийному ансамбльови, спілпрацівникам і кореспондентам лем.фм. Можеме быти горды на того, што сме разом зробили.

Особливо дякую тым, котры мали найбільшу одповідальніст і обовязкы. Демкови Трохановскому за шефредактурованя цілому проєктови і Наталіі Малецкій-Новак за велику і успішну адміністрацийну роботу. Дякую тіж Богданови Ґамбальови і Петрови Медвідьови за інспірацию, поміч і діліня ся досвідчыньом. Дякую старым членам, як і тым, што недавно прилучыли ся до радийово-портальового ансамблю.

Новий рік зачынаме з амбітным пляном зачати высылати в ефірі UKF. На тым будеме ся в найблизшым часі зосереджати. Од початку істнуваня лем.фм працуєме над тым, жебы наше радийо мож было слухати традицийні. До презеса Уряду Електоронічной Комунікациі (UKE) дали сме внесок о приділіня фреквенций 12. листопада/новембра 2013 рока. Дальшы стараня о приділіня частот (фреквенций) і признаня концесиі на наземене высыланя ФМ ведеме в Крайовій Раді Радийофоніі і Телевізиі (KRRiT).

Розвиваме наш інформацийний порталь. Од марця т.р. на його основі будеме складати перший лемківскій тыжденник, котрий, надію ся, даколи буде друкуваний (на початку буде кольпортуваний лем в цифровій подобі).

Не змінят ся єдно – порталь і радийо ЛЕМ.фм будут діяти в синерґіі. В звязку з тым, што буде іщы більше орґанізацийной і редакцийной роботы, буду координувал поєдны задачы. В 2016 р. покликую на функцию шефредакторів двох одповідальных за радийо і порталь:

• Шефредактор радия ЛЕМ.фм: Богдан Ґамбаль
• Шефредактор порталю і тыжденника ЛЕМ.фм+: Даміян Трохановскій

Нашы амбітны пляны вымагают непрестанной професийоналізациі діянь і реструктуризациі. Вшыткых заінтересуваних актывністю в просторі лемківской культуры фурт запрашаме до спілпрацы. Кєд хотіли бы сте ся дашто навчыти, допомочы, спрібувати своіх сил як журналиста, оператор звуку, відео, інформатик, ґрафік, фотоґраф, або при інчій роботі 🙂 (маме вшелеяку апаратуру і своіх специялістів в вельох просторах). А кєд мате уж досвідчыня, знаня, інчы таланты і енерґію, котрыма хочете ся поділити, пиште на radio@lem.fm.

Най вшыткым добрым людям сполнят ся мриі і пляны, а наша Лемковина і творчіст в лемківскым языку най ся розвиват на будуче. 

Стоваришыня Руска Бурса в Ґорлицях
Ведучий Заряду
Павел Малецкій