Новий заряд Руской Бурсы – загальне зобраня 2018

В суботу, 17. марця 2018 р., в Ґорлицях одбыло ся загальне зобраня членів Стоваришыня Руска Бурса – то каждорічна стріча, выникаюча з записів статуту общества, котрой цілю являт ся підсумуваня діяльности орґанізациі за минулий рік. Зобраня зачал ведучий РБ, др інж. Павел Малецкій, котрий привитал прибывшых такой з цілой Польщы членів.

Загальне зобраня членів то предовшыткым орґанізацийно-справописова стріча, зато в мериторичній єй части ведучий П. Малецкій представил присутным справопис з діяльности Стоваришыня Руска Бурса за 2017 р. Окрем офіцияльно прочытаного собом документу, підсумуючого вшытко, што попри Рускій Бурсі ся діяло влони, попросил особы, котры реалізували поєдны проєкты, жебы оповіли і підсумували деякы обшыри діяльности орґанізациі, в котрых брали участ.

Дальше, на загальным зобраню членів Стоваришыня Руска Бурса выступил скарбник орґанізациі, Богдан Ґамбаль, котрий представил фінансовий справопис за 2017 рік, а Мирослав Пелехач, як ведучий Ревізийной Комісиі, одчытал контрольний справопис, по чым присутны члены більшістю голосів затвердили оба документы.

Разом з підсумуваньом минулого рока, бурсакы омовили пляны і проєкты на текучий рік, разом з отриманыма (або плянуваныма, же даколи вкінци придут) ґрантами і середками, котры споможут діяльніст общества в 2018 році. Остало лем подякувати уступуючому зарядови і вшыткым членам, заанґажуваным в ведіня Руской Бурсы в 2017 році.

Загальне зобраня членів Стоваришыня Руска Бурса на наступний рік выбрало на ведучого Даміяна Трохановского. Пониже, полнаий склад нововыбраного заряду:

• Даміан Трохановскій – ведучий заряду
• Богдан Ґамбаль– заступник ведучого
• Наталия Малецка-Новак – секретар
• Андрий Трохановскій – скарбник
• Олена Дуць – член заряду
• Павел Малецкій – член заряду

Члены Руской Бурсы выбрали тіж нову Ревізийну Комісию в складі:

• Мирослав Пелехач
• Варвара Дуць
• Моніка Тылявска

По выборах новых власти стоваришыня, присутны члены перешли до омовліня текучых проєктів і найблизшых плянів. Зобраня перешло справні і в оптимістичній атмосфері. Закінчыло ся в рекордово короткім часі, бо о першій годині перед полуденком остало хосенні завершене.

Желаме новому зарядови вшыткого доброго.