Омбудсман опубликувал інформацию на тему нацийональных і етнічных меншын

6. марця 2025 рока Заступця Омбудсмана Адам Кшывонь представил соймовій Комісиі Нацийональных і Етнічных Меншын інформацию на тему скарг і внесків, якы тыкали меншын в роках 2023-2024. В засіданю участна была тіж директорка Ґрупы до справ Рівного Трактуваня Бюра Омбудсмана Маґдалена Курусь та Яґна Кротоска, правничка з той ґрупы.

Попередню інформацию Омбудсмана на тему скарг і внесків, котры тыкали нацийональных і етнічных меншын в роках 2020-2022, представил товдышній заступця Омбудсмана Валерий Вачев.

Інформация Омбудсмана

Заступця Омбудсмана своє выступліня зачал од підкрисліня важной ролі Омбудсмана в охороні нацийональных і етнічных меншын. «Омбудсман пильнує прав і свобід чловека і громадянина, в тым осіб, котры належат до меншын. Принимат скаргы, веде поступуваня, робит внескы, опрацовує рекомендациі, котры сут адресуваны до орґанів публичных власти. Сутьовым елементом нашых діянь є тіж едукацийна і представительска робота, так жебы в вельокультуровым соспільстві формувати поставу пошаны і недискримінациі» – бесідувал Адам Кшывонь.

Пак представил коротку статистичну інформацию о зголошынях, котры выстосувано до Омбудсмана, якы тыкали нацийональных і етнічных меншын. В роках 2023-2024 вплынуло 45 новых внесків, котры тыкали охороны прав нацийональных і етнічных меншын, а 228 зголошынь тыкало примірів дискримінациі, нерівного трактуваня, насильства і языка ненависти з огляду на нацийональніст, расу або етнічне походжыня – векшына з них тыкала чужинців, а некотры польскых громадян, будучых членами меншын.

Обшырный фраґмент выступліня Заступця Омбудсмана посвятил ситуациі ромской меншыны. Як підкрислил, є она фурт наражена на выключыня, стереотипы і дискримінацию, што перекладат ся м.ін. на тяжкы социяльно-мешкальны обставины, а што за тым іде – здравотны проблемы, проблемы в інтеґрациі з локальным соспільством і проблемы з роботом. Заступця Омбудсмана припомнул значыня урядоводо «Проґраму соспільной і громадяньской інтеґрациі Ромів в Польщы на рокы 2021-2030». Вказал тіж на даякы ограничыня звязаны з проґрамом і обшыри до поправы.

Черговом темом была квестия права до едукациі. Серед звязаных з ньом проблемів были: зменшыня середків на вчыня языків меншын, котре тыкало выключні німецкой меншыны в роках 2022-2024, проблемы з орґанізацийом занять в школі, в котрых вшыткы ученикы вчат ся языка меншыны, доступ до підручників і едукацийных материялів – особливо в контексті словацкой і украіньской меншын.

Заступця Омбудсмана однюс ся тіж до переступств мотивуваных ненавистю. Вказал, же представникы нацийнальных і етнічных меншын фурт зголошуют припадкы зневажаня, горожыня ци нищыня маєтку. Найвеце справ тыкат языка ненависти в віртуальным просторі. В роках 2023-2024 заобсервувано тіж діяльніст тзв. «громадяньскых патролів», котры Омбудсман моніторує.