Партнерьскы реґіоны приграніча бісідовали о продовжованю співпраці

На Уряді Пряшівского самосправного краю (ПСК) в четверь 5-го децембра 2024-го року стрітила ся Словацько-польска комісія про черезгранічну співпрацу.

ПСК привітав представителів Малопольского і Підкарпатьского воєводства, Ґенералного конзулату Словацькой републікы в Кракові, Сполочного технічного секретаріату Краків, Жіліньского самосправного краю і далшых партнерів.

На стрічі занимали ся веце темами, меджі іншым сполочнов черезгранічнов стратеґійов і далшыма проєктами. В центрі інтересу были головно меджінародны драговы корідоры і публічный транспорт в пригранічу.

Участны зосумарізовали дотеперішні актівности в рамках свойой співпраці і реалізацію Проґраму Interreg Польща – Словакія 2021 – 2027, включно Фонду малых проєктів. Заміряли ся так само на приправу проґрамового періоду по 2027-ім році.

Транспорт меджі головныма темами

Увага была присвячена і черезгранічному транспорту ці меджінародным капчаням драг, як суть наприклад найкуртша драга із северу Европы на юг – Via Carpatia, котра буде мати понад 169 км, і автострада D3 (Жіліна – Польща), котра є частьов головной трасы паневропского корідору.

В рамках публічного транспорту в пригранічу і з цільом підпоры турістічного руху одкрыла ся тема желізнічного і автобусового транспорту, але і біціґльового транспорту а модерной транспортовой сістемы на обидвох боках Татер. Окремо занимали ся на робочій стрічі желізнічным споїньом на трасі Будапешт – Кошыці – Кисак/Пряшів – Плавеч – Мушына – Краків, котре є означоване як Via Carpatia.

Словацько-польска комісія так само дефіновала сполочны задачі обидвох країн при обнові Україны.

Концентровала ся і на тему европского зґрупованя Euromontana, і на Карпатьску стратеґію. Тота є інштрументом про розвиток шыршого реґіону із заміряньом на сполочны вызвы, а так само на піднятя поставліня країн середньой і выходной Европы в рамках Европской унії.

Єден із найуспішнішых проґрамів

Проґрам Interreg ся бере за єден із найуспішнішых і найефектівнішых операчных проґрамів на Словакії. Од 2004-го року посередництвом нього до розвитку словацько-польского приграніча інвестовало ся понад 411 міліонів евр із европскых фондів.

В ПСК лем в рамках проґрамового періоду, котрый кінчіть – Interreg 2014 – 2020, зреалізовало ся аж 166 мікропроектів за 7,6 міліона евр. В новім проґрамовім періоді 2021 – 2027 хоче пряшівска жупа пріорітно заміряти ся на посилніня співпраці меджі жытелями і інштітуціями приграніча, як і на проєкты, котры турістічно іщі веце піднимають реґіоны.