Паспорты горі комином

Про Віктора Орбана были в послідніх роках важны дві ідеї. Тов першов є віртуалне велике Мадярьско, тов другов міцна ґрупа V4 як локална опозіція западной части Европской унії. Война му то розбивать.

Нелібералный режім Віктора Орбана, як го сам назвав і в розговорі про словацькый конзерватівный денник, в остатніх роках, кедь все веце одходив од головного прямованя европской політікы, мав, окрім іншого, два вызначны моменты.

Тым першым было будованя якогось віртуалного великого Мадярьска. Орбанова влада зачала роздавати мадярьскы паспорты, котры людям, і кедь не жыють в Мадярьску, позволяють голосовати в мадярьскых выборах, про Мадярів, котры жыють в Сербії ці на Україні, значіть в державах, якы не суть членами Европской унії, навеце забезпечіть европске гражданство а вышткы выгоды, котры з того выходять.

Якраз там, в країнах, котры не суть членами Унії, о тоты паспорты быв і векшый інтерес, як в членьскых країнах. Бо два европскы паспорты чоловіку нич навеце на дадуть.

Окрім того будованя віртуалного великого Мадярьска, значіть посилньованя тісных повязань мадярьскых комуніт в іншых країнах з Будапштьов, підтримовала довгы рокы Орбанова влада своїх і різныма фінанчныма дітаціями, помочов про мадярьскы орґанізації, інштітуції, подникателів, але і прямов підпоров про мадярьскы політічны партії в тых державах.

На другім боці все веце в Бруселі на бік метана мадярьска влада глядала нову алтернатіву, котра бы мала окрім іншого быти в міцнішій ґрупі V4.

Орбан свойов позіційов так Мадярьско дістав до протилеглой позіції з далшыма трьома державами V4, і то у вопросі, котрый не дотулять ся баналных справ.

Тоту дакотры хотіли видіти, головно вдяка великій Польщі, як централноевропску опозіцію внутрі Европской унії. Єдность V4 притім была розбита уж давно. Вказало ся то при многых ініціатівах, кедь країны той ґрупы не знали тримати єдну позіцію, а днесь ся вказує, же штось таке як прожываме, важно нарушыло і іншак історічны щіры братьскы односины Поляків і Мадярів.

Правда, Віктор Орбан одсудив інвазію Російской федерації, Мадярьско підпорило вшыткы протиросійскы санкції з боку Европской унії. Орбан біженців у Мадярьску вітать, не хоснує словник з року 2015.

Но на другім боці хоче Мадярьско утримати боком, не быти в конфлікті прямо з Путіном, у котрого іщі пару днів перед войнов сидів. Орбан через Мадярьско не дозволить транспорт зброї про Україну, сам не хоче додати Києву жадну зброю, і тоты країны, котры ся твердше поставили односно Росії, обвинює з того, же выкликують войну.

Не буду оціньовати позіцію Орбана односно додаваня і транспорту зброї, але не дасть мі не повісти, же на марґо додавок зброї Орбан арґументує, же Мадярьско зброю потребує, а на другім боці, же бы в будучности тота зборя могла быти схоснована і проти мадярьской меншыны в Закарпатьскій области.

Орбан свойов позіційов так Мадярьско дістав до протилеглой позіції з далшыма трьома державами V4, і то у вопросі, котрый не дотулять ся баналных справ, але реалного войнового конфлікту а реалного огрожіня і середньой Европы, і так собі за ліпшого цімбора выбрав Кремель як Братіславу, Варшаву ці Прагу.

На другім боці Орбанови бы перешкаджало, кебы в будучности зброя з Мадярьска была схоснована проти Марядів на Закарпатю, але не перешкаджать му, же днесь є російска зброя хоснована і проти Мадярів із Закарпатя – тых на фронті.

Орбанови ся так може наповнити злый сон. В єдній хвілі може стратити партнерів, з котрыма хотів робити опозіцію Бруселу, покля їх уж не стратив, а такой в тій самій хвілі може стратити і Мадярів з іншых країн, головно з Україны, з котрыма хотів будовати віртуалне Мадярьско.

Бо тоты з Україны днесь, наприклад, не потребують його паспорты, але сердства, котры їм поможуть боронити ся і пережыти. І так ся може стати, же паспорты, котры їм роздав, наконець підуть горі комином.

Статя была написана як коментарь „Вступне до контроли“ лемківского радія lem.fm. Фото: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА