Через Конечну підеме лем піше

Вчера, тo є 3. жолтня/октобра 2023 р. Міністерство Внутрішніх Справ і Адміністрациі подало комунікат, што днес од пілночы часово вертат гранична контроля на польско-словацкій граници. Подібні в Чехах – од пілночы в середу – на граници зо Словацийом ввели вырывковы контролі.

«Контролі будут ведены лем в напрямі візду до Польщы. Границі буде мож перекрочыти лем в вызначеных місцях» – подал Міністер МВСіА  Мариюш Каміньскій вчас вчерашньой пресовой конференциі.

«Гранична контроля буде привернена на основі 28. арт. 1. уст. граничного кодексу Шенґен, котрый бесідує, што в пильным трибі мож привернути контролю. В першым періоді на 10 днів. Мож єй однавляти на черговы періоды, не долшы як 20 днів» – подал головный комендант Граничной Стражы. Згідні з реченым артикулом – цілый період приверніня граничной контролі не може быти долшый як два місяці.

Особы ци поізды будут типуваны до контролі на основі анализы ризика

«Цілю введіня граничных контролі є протитіяня нелеґальній міґрациі з балканьского шляку» – падат арґумент в комунікаті МВСіА. В примірі контролі необхідным буде вказати документы подорожы – особистый довід або пашпорт.

«(…) обсервуючы звекшаючу ся міґрацийну пресию на балканьскым шляку, м.ін. через Мадяры, Словацию, Польщу до Німец, наш уряд рішыл ввести зінтесифікуваны діяня служб, м.ін. Граничной Стражы, Поліциі і Інспекторату Дорогового Транспорту, на границях зо Словацийом і Чехами» – повіл міністер Каміньскій.

Контроля потырват до 13. жолтня/октобра з можливістю продолжыня на черговый період.

В розпоряджыню, котре выдал міністер, окрислены были переходы, через котры мож леґальні переіхати або перейти границю.

Границі мож переіхати через вісем дороговых переходів: Радошыці, Барвінок, Мушынка, Пивнична, Юрґів, Хыжне, Корбєлів, Зврадонь та через три потяговы: Лупків, Мушына, Зврадонь.

Піше, але выключні громадяне Евросоюзу, мож перейти на словацку страну на переходах: Ожынна, Конечна, Лелюхів, Нєдзиця, Лыса Поляна, Хохолів, Вінярчыківка, Уйсолы, Бур, Зврадонь, Яворинка.