Ходят по світі такы люде, якых видно мало, але неєдно діло без них бы ся не зродило. Кєд ґу тому придаме і тото, же не барз люблят выступлювати як фронтмены, світ бы часом іх ани не взріл. А кєд підеме дальше – же то они нам сес світ малюют і вказуют на фотоґрафіях, стоячы з другой стороны апарату, ани ся не дознаме, кым єст тот маляр? Такым чловеком єст фотоґрафік Петро Басалыґа – днешній ювіляр, котрому выполнят ся 60 років.
Петро Басалыґа вродил ся 17. лютого 1955 р. в Свєбодзіні (зах. Польща), але його родичам повело ся вернути на Лемковину до рідной Снітниці. Од 70. років ХХ ст. звязал ся з Креницьом. Товды тіж остає членом Креницкого Фотоґрафічного Товариства, але першы знимкы робил іщы як парунадцетлітній хлопец, хоснуючы “домашні” способы обробкы знимок (молодшій ґенерациі припоминаме, же техніка “клік-і-маш-знмимку”, котру хоснуєме в днешніх апаратах, то дост недавны часы).
Вернувшы до рідного села на Лемковину, взріл доцяп інчий, як низинна земля выгнаня, краєвид. Од того моменту фотоґрафуваня гірскых образів і вшыткого, што на них і над нима, стає ся великом пасийом Петра Басалыґы, котра полністю обнимат два важны аспекты – документує тото, што ся іщы по Лемках лишыло, але мат в с собі вшыткы прикметы найвысшого артистычного рівня. На його знимках видиме церкви, капличкы, кресты, хыжы, сыпанці, але і люди попри них, як роблят, як ся молят, або як лем стоят. Вшытко тото в прекрасных гірскых обставинах Лемковины каждой поры рока.
Його працы мож было обзерати на чысленных выставах в Польщы і поза єй границями. Был участником і лавреатом вельох медженародовых фотоґрафічных конкурсів, з котрых як найбарже престіжовы можеме вымінити выріжніня на конкурсі “Віры і віруючы нашого світа” в 2007 і 2008 рр. за цикль знимок о православію.
То не лем тоты просторы ближе-дальше лучат Петра Басалыґу з русиньскыма справами. Уж од першых Лемківскых Ватр (іщы тых якістных з 80. років ХХ ст.) спілпрацує з редакцийом “Голосу Ватры”, єдиной товды лемківской ґазеты, выходячой лем раз до рока. Зрештом, обшырна фотоґрафічна документация такой вшыткого, што на першых Ватрах в Чарній, Ганчові і Бортным ся діяло, то в великій мірі заслуга днешнього Ювіляря.
Од 90. років ХХ ст. Петро Басалыґа стисло спілпрацує з ґазетом “Бесіда”, выдаваном Стоваришыньом Лемків, будучы том частю редакциі, котра попри высокым мериторычным змісті, выполнят тот двомісячник найвысшым артистычным фотоґрафічым рівньом.
Пане Петре, желаме Вам вшыткого доброго з нагоды Вашых 60. уродин. Най ся Вам і Вашым близкым веде, щестит і каре. На многы і благы літа!
Стоваришыня Руска Бурса в Ґорлицях
Редакция радия і порталю лем.фм
Стоваришыня Лемків
Редакция ґазеты “Бесіда”
Фото горі: з фейсбукового профілю Петра Басалыґы
Коментарі