Посланці в Стропкові схвалили вступ до Карпатьского реґіону

Місто Стропків хоче вступити до меджінародного здружіня Карпатьскый реґіон із центром в польскім місті Ряшів. Як інфомровала аґентура TASR, на остатнім засіданю вступ схвалили містьскы посланці.

Самосправа од того очекує новы черезгранічны принагоды. Місто має быти за словами говорцю міста Петра Новака прияте по вырішіню орґанів здружіня Карпатьскый реґіон.

З пропозіційов на вступ Стропків подля Новака ословило здружіня. В Польщі діє уж майже тридцять років і його членами суть самосправы з области Підкарпатьского і Малопольского воєводства. У 2020-ім році ся змінив штатут здружіня, вдяка чому Карпатьскый реґіон став черезгранічнов юрідічнов особов.

Зміна штатуту в практіці значіла то, же до орґанізації можуть приєднати ся і загранічны особы а субєкты. Першыма членами здружіня із Словакії были місто Спішске Подргадя і села Земпліньскы Гамры, Малый Шаріш але і русиньскы Словінкы на Спішу.

У фінанчній перспектіві на період років 2021 – 2027 буде Карпатьскый реґіон одповідный за справованя фонду мікропроєктів в рамках пріоріты Творче і турістічно атрактівне приграніча в рамках проґраму Interreg PLSK 2021 – 2027. Значіть, орґанізація буде і далше годна співфінанцовати словацько-польскы проєкты аж до сумы 80 тісяч евр у области розвитку турістікы.

Найважнішым проєктом є подля Новака вытворіня і пропаґація карпатьской значкы Carpathia і їй сеґментів Hiking, UNESCO, Vine ці EtnoCarpathia.

„З еврореґіоном співпрацуєме на різных уровнях вже дакілько років, зато вітаме можливость стати його актівныма членами. В новім проґрамовім періоді проґраму Interreg так само видиме принагоду на здобытя далшых фінанчных средств на розвитковы проєкты,“ повів пріматор міста Ондрей Брендза.

Додав, же місто было в проґрамі Interreg 2014 – 2020 успішне з каждым поданым проєктом, причім замірявали ся на інвестічны, але і „магкы“ актінвости в рамках укріпіня черезгранічной співпраці з Польщов, головно з Ряшовом, Крочынов, Бобовов ці Санковов.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА