Посвячыня церкви в Конечній

В неділю, 21. липця/юлия 2019 р., в одбуде ся посвячыня православной церкви св. Василия Великого в Конечній. Зложены будут мощы в престолі та м.ін. посвяченый одновленый іконостас, в звязку з завершыньом тырваючого дакілько років ремонту святыні. Подія буде тіж нагодом на стрічу бывшых і теперішніх жытелів Конечной.

Богослужыня зачнут ся о 10.00 год. Посвяченый буде іконостас, якій через останіх пару років был модернізуваный. Тепер наново в полній своій красі стоіт в конечняньскій церкви. Был він по побудуваню храму привезеный до Конечной з Самбора в 1910 р. Є то рідко стрічаный на Лемковині тип іконостасу, понеже має він сходково уложены іконы.

Сама церков так само перешла головный ремонт. Зроблено новый шалюнок, поправлено підмуруваня сперед сто років, побудувано новы сходы на хор і до самой святыні. Дакус перше вымінено деревяны дощкы в цілій підлозі. Іщы скорше попри церкви побудувано дзвінницю. Влони церковный пляц был огородженый.

Сама церков была вознесена в 1904 р. Попередня згоріла в 1892 р. і стояла в цілком інчым місци як теперішня. Деревяну церков св. Василия Великого, котра днес служыт православным конечнянам, будували теслі з Бойківщыны, прото не є то типовый лемківскій храм, хоц навязує до традицийного сакрального будівництва Лемковины, нп. тридільністю храму і трьома банями.

По выгнаню конечнян в 1952 р. власти заплянували розобрати храм. Вратувати церков помогли вертаючы зо заходу селяне (шырше чытайте гев).

За послідні два рокы буде то уж друга подія, на котрій зыйдут ся так теперішні жытелі села, як і выселены та іх потомны. В 2017 р., так само в липци/юлию, орґанізувано стрічу конечнян в сельскій школі, котра по недавній реставрациі полнит днес функцию світлиці. Товды же, тіж наперед молено ся в конечняньскій церкви. Споминано на жерты акциі «Вісла».