Потягы ретро Лемковином

Ретро потягы зас появлят ся на Лемковині, в звязку з тогорічном едицийом проєкту Малопольскы Пути Желізницьовой Туристикы. Од яри аж до зимы на найкрасшых трасах Малопольщы буде вшыткого 42 переізды.

Переізды забытковыма складами будут реалізуваны од квітня/апріля до грудня 2017 рока. Орґанізує іх Новосандецкє Стоваришыня Любителів Желізниці в спілпрацы зо Скансеном Желізницьового Табору в Хабівці. Малопольскє Воєвідство підпорит проєкт квотом 400 тис. зл, што складат ся 2/3 коштів цілой орґанізациі переіздів. Решта фінансуваня мат походити з продажы білетів.

Окрем переіздів історичным табором, заплянуваны сут тіж додатковы атракциі. Того рока забытковы потягы переіхают найкрасшыма трасами Малопольщы, включаючы особливий кавалец понад 130-літньой давной Ґалицийской Трансверсальной Желізниці. 70-кільометорвий фраґмент той леніі з Хабівкы до Нового Санча представляний єст як єден з барже урокливых трас в Польщы і в Европі. Не меньше мальовнича єст траса переізду з Нового Санча до Крениці, через села долины Попраду: Верхомлю, Зубрик, Андриівку, Милик. Желізна дорога веде тіж м.ін. через 513-метровий тунель в Жеґєтові. Переізды тым путьом будут два: 27. мая та 23. вересня/септембра. Выізд з Нового Санча заплянуваний єст на 10.00 год. Перед 13.00 год. потяг повинен дотерти до Крениці, де зрытхуваний буде проґрам атракций. Медже 13.00 а 17.00 год. склад буде курсувал медже Креницьом а Мушыном, де зас зорґанізуваний буде дворцьовий фестин, а 23. вересня/септембра додатково буде проходил в тым курорті Мушыньскій Ярмак. О 17.00 год. потяг поіхат назад до Нового Санча.

Окрем акций на затриманках, в проґрамі передвиджено час, жебы пізріти на місцевы туристичны і рекреацийны атракциі, пікнікы, выступы музычных ґруп, стоіска з закусками, або пленеровы історичны реконструкциі. Вандрівникам в потягах будут товаришыти аніматоры Ґруп Історичной Реконструкциі Польского Історичного Товариства та Округового Музею в Новым Санчы, позбераны в облечыня минулых епокх. Постійным елементом переіздів буде особа дижурного руху з зеленым лизаком в руці, котра буде одправляла потягы з поєдных стаций.

До прогульок схоснуваны будут історичны локомотивы і ваґоны з рр. 1920-1963, якы походят з колекциі Скансену Желізницьового Табору в Хабівці.

Того рока забытковий склад перший раз буде іхал долином рікы Білой, з Нового Санча, через Ґрибів, Бобову, Ґромник, Тухів до Тарнова, а черговий раз потяг ретро доіхат тіж і до Ґорлиц. Дата переізду получена єст з празднуваньом через місто Днів Ґорлиц, додатково буде мож переіхати до поблизкого Біча – перлины, богатой в середвічну забудову. Окремий специяльний переізд до того місточка заплянуваний єст на 24. вересня/септембра.

Дрібниці вшыткых плянуваных переіздів і місце, з котрого мож зарезервувати білеты, найдете гев.