Праздник св. Максима і інґрес владыкы перемышльско-ґорлицкого

В віторок, 6. вересня/септембра т.р., в Ґорлицях будут проходити шторічны святкуваня з нагоды праздника св. Максима Ґорлицкого. Тогорічны богослужыня сут получены з інтронізацийом єпископа Паісия на предстоятеля перемышльско-ґорлицкой єпархіі.

Святкуваня зачнут ден перше Всеночном – в понедільок од 17.00 год. В ден праздника од 6.00 год. буде служена ранішня Свята Літургія, а пак Акафист перед мощами святого. Пізнійше, по привитаню владык, од 10.00 год. зачнут ся празднуваня, получены з інґресом на катедру історичной православной перемышльской єпархіі.

Інтронізация в православній Церкви має долгу традицию і выводит ся іщы з часів Візантиі. За єй чыном торжественно проходит введіня нового владыкы на престіл єпархіі, або – в примірі патріархів або митрополитів (архієпископів) – помістной Церкви, котром буде завідувал. Чын введіня владыкы на катедру проходит вчас Святой Літургіі, по молитві Трисвятоє. Товды двох найстаршых віком владыків (а в приміри інтронізациі єпископа єпархіі, найчастійше предстоятель локальной Церкви і другій архіпастыр) саджают нововыбраного владыку на престіл (трон) катедры, котром буде од той поры завідувал. Пак, хор за владыками і священниками выспівує Аксіос, што з грецкого языка значыт гідний (достойний). Обряд інторонізациі ріжнит ся деякыма деталями в ріжных помістных Церквах.