Представителі OSCE інтересують ся Русинами

До Закарпатьской области Україны бы мали в найблизшім часі прийти представителі Орґанізації про беспеку і співпрацу в Европі (Organization for Security and Co-operation in Europe, OSCE). Інформує о тім україньскый інтернетовый портал «Новини Закарпаття».

Представителі OSCE бы мали Закарпатьску область Україны навщівити із причіны досліджованя проблему вызнаня Русинів на Україні. За неофіціалныма інформаціями, котрыма має діспоновати портал, Европа має быти знепокоєна тым, же русиньска тема може дестабілізовати сітуацію на европскій граніці.

Портал припоминать, же Русины суть в іншых державах світа вызнаны, і же Орґанізація зъєдиненых народів рекомандовала Русинів вызнати і Україні. Так само статя припоминать, же вопросы народностных меншын суть в Европі пріорітныма.

Підкреслюєме, же русиньскы орґанізації, котры досправды діють на Україні, ниґда не мали інтерес дестабілізовати сітуацію в Закарпатьскій области Україны, ниґда не говорили о будьякых актівностях, котры бы мали нарушыти теріторіалну цілость Україны. Русины на Україні єднако як і Русины в іншых державах світа суть мірныма і законопослушныма гражданами свойой державы. Вєдно з тым але вказують на порушованя їх прав од 1991-го року. О дестабілізації і сепаратізмі суть обвиньованы україньскыма медіями, русиньскыма нежычливцями і самы київскым естаблішментом.

Орґанізація про беспеку і співпрацу в Европі є міджінароднов беспечностнов орґанізаційов, котра выникла тренсформаційов Конференції о беспеці і співпраці в Европі в 1995-ім році. OSCE має 56 участницькых держав Европы, Середньой Азії і Северной Америкы. Цільом членьскых держав є підпора і розвиток демократічной сполочности решпектуючой людьскы права і основны свободы, превенція локалных конфліктів, обновльованя міру во войновых областях, просаджованя колекктівной беспекы, забеспечіня соціалной справедливости і охорона жывотного оточіня.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА