В четвер, 21. січня/януара 2021 р., одбыла ся традицийна стріча польской президентской пары з представниками ріжных реліґійных конфесий і репрезентантами нацийональных і етнічных меншын. Конференция з причыны пандемічных ограничынь проходила онляйн.
«То стріча спільноты віруючых люди ріжных нацийональности в Польскій Республиці. Уж шестый раз сме разом, хоц в тым році в барз трудным часі, тіж для віруючых люди і іх пастырів, носячых спертя», бесідувал президент Анджей Дуда вчас веденой відеоконференциі.
В новорічній стрічы взяли участ єрархы римокатолицкого Костела, але так само представникы східніх конфесий: Польской Автокефальной Православной Церкви і Украіньской Грекокатолицкой Церкви в Польщы. Присутны были і дальшы представникы конфесий зъєднаных в Польскій Екуменічній Раді, владыкы Ординарияту Польского Войска (в тым православны і євангелицкы), представникы жыдівской і мусульманьской спільнот, та дальшы запрошены гості.
Президентска пара запросила так само представників нацийональных і етнічных меншын. Присутны были особы, якы засідают в Спільній Комісиі Уряду та Нацийональных і Етнічных Меншын.
Дуда вєдно з Першом Дамом передали вшыткым присутным на відеоконференциі новорічны желаня. «Желаме предовшыткым здоровля, сил, оптимізму і тырвалой віры – віры передаваной в серця вірных, же спільно переможеме коронавіруса і в міру можности повернеме до нормальности», повіла Аґата Корнгаузер-Дуда.