При реформі самосправы мусить быти забезпечене захованя існуючіх народностных прав. Меджі Русинів пришов і уповномоченый Акош Горонь

В пятніцю 15-го мая 2026-го року в Пряшові одбыло ся 40-те засіданя Округлого стола Русинів Словакії (ОСРС). Платформа на своїм засіданю привітала і уповномоченого влады СР про народностны меншыны Акоша Гороня. ОСРС на своїм засіданю обговорив дакілько актуалных тем.

На юбілейнім засіданю ОСРС брав участь і уповномоченый влады СР Акош Горонь, котрый на початку членам платформы приговорив ся. Уповномоченый так само актівно залучав ся до робочой части проґраму пятніцьового засіданя.

Меджі присутныма быв і Ян Коцак, русиньскый амбасадор, котрый є одповідный за кооперацію при підпорі і розвитку русиньской комуніты Пряшівского самосправного краю (ПСК). Коцак інформовав членів ОСРС о тім, якы конкретны крокы ПСК зробив в русиньскых реґіонах про зліпшіня якости жывота жытелів, але і о підпорі конкретных културных подій, котры орґанізують ся в селах і містах, де жыють Русины.

ОСРС занимав ся і проблематіков русиньского музейництва, сітуаційов у СНМ – Музею русиньской културы в Пряшові, причім председа Мілан Піліп інформовав членів, же в найблизшых днях ку тій тему представителі платформы стрітять ся із веджіньом Словацького народного музея.

Представителі русиньскых інштітуцій, обчаньскых здружінь і актівісты, котры суть членами ОСРС, бісідовали і о потребі выпрацованя єднотной візії, котра бы встановила, котры актівности підпорьованы дотачныма схемами бы мали быти про Русинів пріорітов.

Кедьже рихтує ся новелізація закона о сельскім і містьскім зряджіню, а Здружіня міст і сел Словакії вєдно із здружіньом Самосправны краї Словакії в марці представили сполочный позічный документ ку реформі публічной справы, платформа на своїм засіданю занимала ся і тов темов.

Округлый стіл Русинів Словакії апелує на владу Словацькой републікы і Народну раду Словацькой републікы, жебы при рихтованю новелізації закона о сельскім і містьскім зряджіню, і реформі самосправы забезпечіли захованя існуючіх прав народностных меншын. ОСРС єдночасно жадать, жебы были представителі народностных меншын актівно залучены до приготовліня реформ, і жебы были пропонованы крокы оціньованы і з погляду їх дослідків на меншыновы комуніты в згоді із Конштітуційов Словацькой републікы і меджінародныма обовязками Словацькой републікы.