Проба «Лемковины»! Уж в найблизшу неділю!

Заряд ансамблю «Лемковина» офіцияльным писмом повідомил бывшых і новых членів о стрічы, котра одбуде ся 22. листопада/новембра т.р., од 14.00 год., в будинку Руской Бурсы в Ґорлицях.

Буде то орґанізацийна стріча членів і кандидатів до ансамблю, на котрій будут омовлены вшыткы справы, звязаны з дальшом діяльністю «Лемковины». Кєрівництво звертат ся з просьбом о повідомлюваню другых заінтересуваных осіб, якы схотіли бы приголосити ся до одроджуючого ся аснамблю.

Ден перед, в суботу 21. листопада/новембра в Ґорлицкым Центрі Культуры буде проходил І Фестіваль Лемківской Авторской Творчости – «Молода Лемковина». Заохочаме вшыткых, котры в суботу придут на фестіваль, жебы спомогли возроджыня ансамблю «Лемковина»!

З Вами «Лемковина» з Білянкы може зас осягнути тото, чым горды сме доднес. Хоц то далека дорога, певно неєеден Лемко мриє о такій силі ансамблю з давных років його славы, коли ішол медже інчы народы шырити забиту в час комунізму лемківску народніст. Оснований в 1969 р. од самого початку был підпором для споневераных Лемків, котрым на каждым кроці комуністычний режім бесідувал же іх неє. Незломніст Маестра Ярослава Трохановского довела до того, же быти Лемком товды наново привертало віру в силу Народу, давало змогу плеканя лемківской достоменности і лемківского языка. Без «Лемковины» не было бы першых Лемківскых Ватр, котры товды были правдивым святом лемківской культуры.

Быти членом «Лемковины» то велика гордіст і чест. Аснамбль через вшыткы рокы свойой діяльности выховал выдатны персоны, котры по 1989 р. причыныли ся до одроджыня Русинів в Польщы. Хоц офіцияльні был лем ансамбльом пісні і танця, неофіцияльні был єдином лемківском орґанізацийом, зберігаючом лемківску достоменніст. Разом з братом Ярославом, для котрого был підпором, ведучым членом і солистом ансамблю был днешній символ Русинів в Польщы – Петро Мурянка-Трохановскій. За десяткы років «Лемковины» спід єй крыл вышло вельох выдатных музыків, поетів, науковців і політычных діячів.

Мриєме о повороті до величыны «Лемковины». Ци так буде? – Вшытко залежыт од ВАС! Придте – «Лемковина» жде!

Спомнийте, як «Лемковина» співала колиси пісню На Лемковині, скомпонувану Ярославом Трохановскым на слова Івана Русенка, котру днес Лемкы постерігают як свій локальний русиньскій гымн.