Проблема із проблемами

На початку септембра Мадярьско знова раз заблкоковало продовжованя в приступовых переговорах Европской унії із Українов. Будапешт і тот раз вказовав на проблемы із правами народностных меншын, конкретно Мадярів на Україні, і Київ знова раз не розумів.

То, же і кедь ся змінила політічна ґарнітура в Мадярьску, не буде значіти прогульку ружовым садом про Україну в рамках пути до Европской унії, сьме знали од початку.

Петер Мадяр ясно одсуджує Росію за воєньску аґресію на Україні, не є союзником Путіна, но так само высловив свої ясны позіції што до приятя свого судіда до европского клубу. Окрем іншого ясно вызвав на ґаранцію народностных прав, а высловив ся так само проти даякого ускореного приступового процесу.

На початку септембра мадярьска влада вказала, же то думать серьйозно. 8-го септембра ся членьскым державам Унії не подарило пересвідчіти Мадярьско, жебы было згодне із одкрытьом капітол 2 і 3.

Подля мадярьского вебсайту 444.hu влада премєра Мадяра не хотіла схвалити резултаты скрінінґу потребного ку обидвом капітолам, і не підпорить далшу фазу процесу приступліня, покля Київ не зробить потребны крокы ку наповніню своїх білатералных обовязків в области прав народностных меншын.

В україньскых медіях было мож чітати різны статі, різны коментарі, котры із Мадяра робили другого Віктора Орбана, але не мож было якось найти текст, котрый бы обєктівно признав хыбу на боці Україны, признав, же Україна реално не робить тото, што бы в рамках прав народностных меншын робити мала, і за што єй крітікує Будапешт.

Ку кінцю септембра быв на дводньовій навщіві Україны мадярьскый омбудсман Імре Югас. Вєдно із уповномоченым Верьховной рады Україны про людьскы права Дмитром Лубінцьом были на Підкарпатю, де навщівили дві мадярьскы школы, але далшы моніторінґовы ґрупы довєдна навщівили аж 11 школ.

За словами Дмитра Лубінця почас двох нів, коли проходили споминаны моніторінґы, не были зафіксованы жадны порушіня прав мадярьской народностной меншыны. А нелем то.

Лубінець повів, же мадярьскому колеґови вказали, же Україна выбудовала „найліпшый приклад“ охраны прав народностных меншын. „Думам, же мы, як омбудсманы, пересвідчіли сьме ся, же жадной проблемы не існує,“ повів Лубінець і додав, же існують політічны выголошіня, котры не мають нич із реалностьов.

Омбудсман Лубінець має дакус чудну представу о правах народностных меншын. То, же мадярьскы діти мають іщі днесь школы на Підкарпатю, є в порядку. Но не треба забыти на факт, же тоты шкокы іщі днесь суть лем зато, бо быв великый і довгодобый тиску із боку мадярьской влады. А пак і Брусела. Іншак бы україньска леґіслатіва, котра односить ся на освіту і державный язык, уж давно тоты школы прогребила.

А головно, права народностных меншын не є лем то, ці діти днесь мають іщі свої народностны школы. Діапазон того, што є охрана прав народностных меншын, є омного веце шырокый. А же того Україна в тій области не сповнює до блуду вельо, то добрі знаме.

Кедь Лубінець бісідує о тім, же выбудовали найліпшый приклад охраны народностных меншын, най ся іде посмотрити до сусідніх держав, де суть із народностныма правами они, і де Україна.

Писати о тім бы мож было цілу дізертацію, лемже каждый, хто холем дакус видить до проблематікы прав народностных меншын знать, якым „найліпшым прикладом“ Україна є.

Найвекшов проблемов Україны є, же она не видить свої проблемы. Она їх не виділа ани при кроках, котры мала зробити односно народностных меншын, а україньску леґіслатіву односно народностных меншын мусив Київ мінити аж під тиском Унії ці Венеційской комісії. Кебы не было їх, Україна бы жадну проблему не мала. Не виділа.

Намісто виджіня властных проблем Україна все лем обвинює другых, котры суть автоматічно неприятелі, кедь звернуть увагу на їй проблемы, припадно жадають їх вырішыти. І такый приступ мож практіковати. Лемже пак най ся не чудує, же буде стояти на місці, без проґресу в приступовых переговорах, кедьже собі не знать вырішыти свою проблему із проблемами.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.