Пробны матуры з меншыновых языків в половині місяця
В добі тырваючой пандеміі проходят пробны матуры з поєдных предметів. Часу єст штораз меньше. Уж о нецілы два місяці тисячы матуристів засядут до лавок, жебы написати єден з найважнійшых еґзамінів в жытю. Серед них можут быти ученикы лемківского языка.
В тых днях тырвают пробны матуры з основных предметів. В половині місяця пробуваны будут еґзаміны з меншыновых языків.
Нелегка проба
Од середы, 3. марця, проходят в Польщы пробны матуральны іспыты орґанізуваны Центральном Еґзамінацийном Комісийом. Потырвают они до 16. марця. Участ шкіл в пробных еґзамінах не єст обовязкова, зато тіж з причыны пандемічных ограничынь част шкіл зрезиґнувала з них.
Матуры мают быти проведены в условіях як найбарже зближеных до обовязуючых в часі правдивых матур, з захованьом санітарного режіму. Пробны еґзаміны обнимают і іспыты з меншыновых языків, в тым з лемківского языка на розшыреным рівни.
Тогорічны абітуриєнты можут приступити до пробного еґазміну з лемківского языка, якій пройде посліднього дня іспытів, тє. 16. марця. Для тых учеників, котры не можут приступити до пробных матур, еґзамінацийны аркушы будут поміщены на вебсайтах Центральной Еґзамінацийной Комісиі, Міністерства Едукациі і Наукы та округовых еґзамінацийных комісий.
Каждый матуриста мусит обовязково приступити до трьох писаных еґзамінів: з польского языка, математикы і новожытного языка. Дальшы еґзаміны сут добровільны. В тым році, вынятково, не буде бесідуваных еґзамінів з польского і чужых языків. Вынятком будут ученикы, якы мусят мати проведены такы еґзаміны з огляду на результаты і рекрутацийны вымогы на поєдны высшы студиі за границьом.
Матура з лемківского языка
Перша матура з лемківского языка была написана в 2013 р. Першым одважным был Данько Возняк з ІІ Загальноосвітнього Ліцею в Ліґници. Рік пізнійше было уж двох матуристів, єден зас в Ліґници, а другій в Ґорлицях. Од осмох років, рік в рік находят ся охочы здавати матуру в рідным лемківскым языку. Майме надію, што не інакше буде і того рока.
В першых роках мож было здавати матуру з лемківского языка заєдно на основным, як і розшыреным рівни. Од даякого часу можливіст здавати основного рівня єст доступна для меншыновых языків лем в тых школах, котры ведут обовязкове вчыня з того языка. В прим. лемківского, де до днес не функцийонує хоц єдна школа, де бы ся обовязкого в проґрамі вчыло лемківского языка, можливіст здавати єст лем розшыреный рівен. На тій матурі ученик має за задачу написати долшый текст на єдну з двох выбраных тем.
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
