Проєкт сохраніня Маґурского Нацийонального Парку

Під конец третьой чверти 2016 рока буде выставлений на 21 днів до публичного вгляду проєкт сохраніня Маґурского Нацийонального Парку, якій по підписаню через Міністра Середовиска буде обовязувал наступных 20 років. Плян проєкту мож почытати за тым мотузком.

Уж тепер плян тот выкликує деякы контроверсиі серед жытелів ґміны Крампна, з огляду на декотры з пропозиций. Маґурскій Нацийональний Парк, зрівнуючы го з більшістю парків полудньовой Польщы, єст релятывні добрі повязаний з лісовыма обшырями, якы находят ся поза його границями, але і находит ся в єдным з ключовых обшырів головного карпатского біокоридору*. Окрем получыня Парку з лісовыма обшырями Низкого Бескіду, положеныма на схід і захід од його границ, сутьову ролю полнит получыня медже полудньовом а пілнічном частями Парку, котры розділены сут заселеным простором: Поляны – Крампна – Котан. Сохраніня біокоридорів, якы складают ся на найкоротшы получыня пілнічной з полудньовом частями Парку, то найважнійшы цілі фунґуваня заселеной обшыри. В опініі єй жытелів, не взяты сут до увагы заявляны нима внескы, якы мали бы влияти на іх жытя в сусідстві хороненой зоны. Проблематычныма остают біокоридоры – пути, де будут переходити, і вызначыня специяльной буфоровой части, окружаючой парк, о шырокости 200 метрів. В тым поясі має быти введений заказ будовы.

Директор МНП, Анджей Чадерна, пояснят, же коли в тій зоні єст уж даякє ґаздівскє поле, то такым і остане. Новы реґуляциі мают тыкати кубатуровой забудовы – буде заказ такой будуваня, з тым вынятком, же коли уж істнуючы інвестицийны пляны забудовы ґміны находят ся в обшыри компактной забудовы, то Парк не буде мал на тото влияня. В спомненым пляні мож вычытати, якы з підниманых внесків остали в взяты до увагы – напр. удоступнити трасу Святкова Велика – Бортне з перенесіньом фраґметну жолтого туристычного пути (о тій ініциятыві писали сме гев і гев).

Змінити мала бы ся тіж обшыр строгой охороны** – ґрупа дослідників, котра опрацовала плян, запропонувала обняти том охороном коло 38% простору Парку (што єст такой трикратным збілшыньом дотеперішнього засягу той зоны). Меньше риґористычна зона, тзв. актывной охороны, обнимала бы коло 61%. В ній, інакше як в зоні строгой охороны, дозволена єст в деякых ситуациях безпосередня інґеренция в середовиско і його процесы.

* біокоридор – анґ. wildlife corridor / habitat corridor, поль. korytarz migracyjny / korytarz ekologiczny

** строга охорона – анґ. strict protection, поль. ochrona ścisła,