Рекорд дурноты

Русиньске село Кружльова, котре находить ся в Долині смерти, на теріторії, де проходила Карпато-дукляньска операція, має на своїм конті такой дакілько рекордів. А послідні дні в словацькых медіях, але нелем, резонує знова.

Подля офіціалных інформацій, котры суть доступны, має Кружльова ку днешньому дню девять рекордів. Восьмым рекордом, котрый недавно прибыв у селі, є найвысшый православный крест на Словакії. Девятым словацькым рекордом в Долині смерти є найвысша дзвоніця в тварі патрону.

Але окрем того там мають, наприклад, найвекшый горізонталный і вертікйалный напис Долина смерти, котрый є в екстерьєрі, пак є там памятник вытвореный макетами воєньскых пушок ці найвысша выглядкова вежа в тварі патрона. Што вшытко там є, властно ани не треба знати. Бо увагу медій і людей в послідніх днях притягло штось інше.

В суботу 3-го октобра, в день, кедь на Дуклі проходили святкованя 82-ой річніці Карпато-дукляньской операції, в Кружльовій быв одкрытый памятник совітьского маршала Конєва. О такім памятнику мали минувшый рік в місяці май бісідовати в Москві словацькый премєр Роберт Фіцо і російскый презідент Владимір Путін. Але офіціално не іде о памятник, котрый бы мав даякы капчаня із словацькыма або російскыма властями.

Памятник не є подля слов старосты Кружльовой ани актівностьов села. Як повів про єден словацькый денник, „дали сьме лем простор і позволіня“.

Памятник дав зробити і одкрывав го Словацькый союз протифашістічых бойовників. Жебы было ясне, днесь є то одкрыто проросійка орґанізація, якой функціонарі не мають проблему стрічати ся ани із політіками із руху Републіка. Тоты ся одторгли од Маріяна Котлебы, а в часах, коли были у Котлебы, высловльовали ся проти Словацького народного повстаня ці величали презідента войнового Словацького штату – Йозефа Тіса. І зато антіфашісты (істинны) перед часом основали собі другу орґанізацію.

Міністер Ріхард Такач, котрый быв на одкрытю памятника, якраз днесь, в часі писаня коментаря, признав, же ани не знать, хто дав грошы на памятник. Подля нього ся „складали люди“.

Але вернийме ку Конєвови. Скулптура, котра на Словакії никому не браковала ани в часах чехословацького соціалізма, теперь появила ся в Кружльовій. А хто властно тот славный маршал быв?

Монастырь святого Іова Почаївского основали російскы монахы, в році 1944 втікали перед маршалом Конєвом і його ослободителями.

Од 1944-го року командовав 1-му україньскому фронту, котрый брав участь на Карпато-дукляньскій операції. Його войска войовали на теріторії днешньой Польщі, ослободожовали чеськы країны, і 9-го мая 1945-го року вступили до Прагы. Свою заслугу на переможіню націзма в Европі має.

Лемже тот сам Конєв є скапчаный так само із кырвавыма репресіями почас російской гражданьской войны, із насилным потиснутьом мадярьского повстаня за слободу в 1956-ім році, із підозріньом, же в році 1968, перед окупаційов Чехословакії, робив шпіонаж проти чехословацькой армії.

Конєв має „заслугы“ і на тім, же в році 1945 были насилно совітьскыма орґанами на теріторії Чехословакії затримованы і наслідно посланы до лаґрів у Союзі чехословацькы гражданы, котры были російского походжіня, і в Чехословакії нашли нове обыстя, кедь втікали перед більшевиками. О „заслугах“ маршала бы ся дало продовжовати.

В часі, коли в Кружльовій одкрыли памятник Конєва, Словакія не має ани єден памятник ґенералів Ґоліана і Віеста, котры вели Словацьке народне повстаня. Не є ани доста памятників, котры бы першорядо припоминали чехословацькых вояків, меджі нима были і Русины, якы войовали і клали свої жывоты за Чехословакію.

Ціла сітуація має і траґікомічный розмір. Недалеко Кружльовой є Ладомирова, де в меджівойновім періоді быв православный Монастырь святого Іова Почаївского, котрый основали російскы монахы, якы так само втікали із Росії вдяка більшевикам, і зробили на теріторії Русинів історічно вызначну православну місію. В році 1944 знова втікали, одышли втогды до Споєных штатів. Втікали перед маршалом Конєвом і його ослободителями.

І так село, котре має рекорд в тім, же має найвысшый православный крест, лем дало „простор і позволіня“ на памятник тому, перед котрым православны монахы втікали. Село собі так, ани не знало як, приписало новый рекорд. Рекорд дурноты.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Wikipedia.