Реляция з громадной стрічы Общества св. Йоана Крестителя – віторок, 20.00 год.

24. вересня/септембра 2016 р. во Свиднику проходила громадна стріча Общества св. Йоана Крестителя (інформували сме вас о ней гев). Запрашаме до выслуханя реляциі з той же подіі. Почуєте промовы вшыткых прелеґентів, а то: предсідателя Общества о. Ярослава Поповця, о. Мартіна Костільника, державного секретаря в міністерстві освіты Словациі – Петра Крайняка. Голос забрали тіж Мартін Караш – предсідатель Русиньской Оброды на Словациі і Петро Мацко з орґанізациі Молоды.Русины. Прочытаны остали і поздоровліня од осіб, якы не могли быти присутны на стрічы, а то: Мілош Стрончек з Окресной Орґанізациі РОС во Свиднику та Округлого Стола Русинів Словациі і доц. др Анна Плішкова з Інституту Русиньского Языка і Культуры Пряшівского Університету в Пряшові.

Одчытане было писмо од пряшівского архієпископа і митрополиты Яна Бабяка. Владыка передал поздоровліня і архієрейскє благословліня вшыткым участникам. Свою проповід дал тіж о. Франтішек Крайняк з Камюнкы. Тыкала ся она русиньскых церковных перекладів. В своім рефераті зосередил ся на розумліню і значыню літературного языка в каждым просторі жытя, а головно в літургічній сфері.

Запрашаме до слуханя!

Реляция з громадной стрічы Общества св. Йоана Крестителя – віторок, 20.00 год., повторіня 2.00, 8.00 та 14.00 год. наступного дня і 1. жолтня/октобра о 8.00 год.