Рим ся высловив, кавза незакінчена

То, же по смерти владыкы Мілана Шашіка будуть претензії Києва односно Мукачівской єпархії ожывлены, ся дало чекати. Высловы головы Україньской ґрекокатолицькой церькви то і потверджують.

Лем пару днів по смерти різны „експерты“ высловльовали ся в україньскых медіах о тім, коли прийде ку „зъєдиненю“ Україньской грекокатолицькой церькви з Мукачівсков єпархійов, котра є церьквов sui iuris – свого права, прямо підпорядкована під Рим. Нашли ся і такы експерты, або може ліпше повіджено бунтуючі, котры выписовали, же Київ є готовый робити паралелны парохії на теріторії Мукачівской єпархії, покля Ужгород, або Рим, повість ніт такому „зъєдиненю“.

Треба звернути увагу, же пошырьованя такых непідложеных інформацій досправды є на граніці, коли ся треба звідати, хто суть тоты експерты на тему, і ці є їх намагов зробити таку реліґійну войну о храмы, яку пережывають православны на Україні.

О проблемі такого приєднаня – то адекватніше слово, Мукачівской єпархії ку Києву єм вже писав веце раз. Є то абсолутно нерелевантне уж лем з того боку, же іде о дві церькви з іншов традіційов. Оперовати тым, же сьме вшыткы ґрекокатоликы і так маме быти вєдно, є неправилне, а пасує то Українцям лем втогды, покля мають штось „зъїсти“ они. Уж то не платить, коли самы основають властны парохії або єпархії підпорядкованы під Київ, і в тых припадах, кедь в даній державі є інша містна Ґрекокатолицька церьков.

Кедьже медіалны тискы зачали коротко по смерти єпіскопа Шашіка, на тему приєднаня высловив ся в септембровім інтервю, котре робив Олександр Гаврош, і сучасный апостольскый адміністратор Мукачівской єпархії, владыка Ніл Лущак. Якбач і на велике скламаня Гавроша адміністратор одкрыто потвердив, же є прихыльником той лінії, котру боронив і владыка Шашік – лінії мукачівской традіції. І як додав, така є позіція і Апостольского престола.

Верьховный архієпіскоп Україньской ґрекокатолицькой церькви Святослав Шевчук публічно тему не рішыв. Аж до децембра. Втогды в ефірі Живого телебачення одкрыв тему і він.

З його высловів ся дізнаме, же київска церьков „все была приготовлена зъєдинити ся“, што і демоноштровала. Покля бы сьме мали протлумачіти тоты слова до зрозумілого языка, пак бы сьме мусили написати, же перед тым Львів, і теперь Київ як столиця Україньской ґрекокатолицькой церькви, все робили тискы на то, жебы Мукачівску єпархію „зъїсти“.

Было так уж на зачатку 1990-ых років на стрічі єпіскопів з Україны в Римі, проти чого ся поставив владыка Йоан Семедій, досправдовый Русин, а быв проти того і Рим. Успішны не были ани кедь пришов на посаду єпархы Словак – єпіскоп Шашік. Но і теперь знова дакотрым якбач здає ся, же є можность.

У высловах Шевчука на тоту тему суть і далшы інтересны справы. По перше, підкреслює, же владыка Ніл є лем адміністратор вакантной єпархії, і о можностях „зъєдиненя“ буде мож говорити, аж кедь буде мати єпархія правлячого єпарху. З тым, же занедовго зачне глядати ся такый єпарха. По друге, же ся треба молити за доброго архієрея.

Вшытко было бы файні, кебы то не были лем представы архієпіскопа. По перше, ниґде не є написано, же Рим не потвердить за єпарху якраз сучасного адміністратора. Може не буде треба глядати никого іншого. Значіть то, же Рим зачне дораз глядати, є Шевчукова інтерпретація. По друге, покля є приготовленый „зъєдинити ся“, пак є ясне, же не є прихыльником позіції владыкы Ніла, так як і попередніх єпіскопів мукачівскых, быти окремо од україньской церькви. Зато, за кого ся іде молити? По третє, будьхто буде єпархом, рішіня і так зістане на Римі. І тото є найосновніше.

Україньска ґрекокатолицька церьков буде бізовно робити тиск. Она го робить історічно. На свій хосен. Думать, же так досягне то, што хоче, а мать і дакус правду, бо вельо раз так і было. Тиском є і то, же Шевчук ся зохаблять ословльовати патріархом, хоць ним не є, але Українці мають велику тугу мати патріархат. Тиск є і на Мукачівску єпархію. Ани в першім, ани в другім припаді їх не інтересує, што думать о проблемі Рим.

І нам зіставать вірити, же кедь не про Україньску ґрекокатолицьку церьков, пак про решту Католицькой церькви зіставать платным: Roma locuta, causa finita. Но і односно „зъєдиненя“ уж предці позіція Риму повіжедна была.

Статя была написана як коментарь „Вступне до контроли“ лемківского радія lem.fm. Фото: pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА