Різдво в лемківскій культурі – выстава в Кєльцях

Од заране, 12. грудня/децембра 2017 р., в Дворку Лащыків в Кєльцях буде мож обзерати выставу присвячену святам Рождества Христового в лемківскій культурі.

Музей Кєлецкого Села – орґанізатор выставы, в своім анонсі про подію подає, што буде запрезентувана забыта уж днес культура ґуралів Низкого Бескіду та по части Сандецкого Бескіду, якы популярно называны сут Лемками – з чым не докінце мож ся згодити. З другого боку, факт, што Русины в Польщы по выселінях в 40. роках ХХ ст. безповоротно стратили більшіст прекрасных різдвяных традиций, може оправдувати слова музею. 

Запрезентуваны будут материялы походячы з Музею Кєлецкого Села та Музею Народного Будівництва в Саноку. На выставі вказаных буде пару періодів повязаных зо святами. Перший з них то період рыхтуваня ся до Різдва. Даний буде притиск на передсвяточны вечіркы та знаны в народній культурі «Федоры», якы были розрывком про молодых. Рыхтуваню до свят товаришыли такы забавы як «печыня когута» ци гра в «дупака». З того періоду вказаны будут героі выступуючы в «Федорах» – Жыд, Туронь ци козыбраты. 

Сам період Рождества одпрезентуваний буде в формі святвечера. Експозиция збогачена буде лемківскым рукоділом – вышывками, облечыньом, кераміком та меблями. Посвяточний час повязаний з праздником хрещыня Ісуса Христа в лемківскій народній культурі менуваний є Йорданом. В єдній з ескпозицийных саль зрыхтувана буде специяльна част як раз про Йордан. Вколо зааранжуваного креста, якій вытятий в леді на ріці, покладены будут інчы предметы повязаны з тым великым церковным і народным святом. В русиньскій культурі припоминана є іщы єдна велия, а то Щедрий вечер, якій попереджат праздник Христового крещыня. 

На выставу буде мож позерати до 18. лютого/фебруара 2018 р.

фот. фраґмент видовиска «Федоры» в выконаню ЛАПіТ Кычера