Од понеділька, 3. серпня/авґуста 2020 р., новым директором Осередка Культуры Ґміны Ґорлиці є Лемко, Роман Корбич. Вычерял він на тій функциі дотеперішню директор, котра одышла на пенсию.
Корбич є знаном особом в Ґорлицях і реґіоні, а напевно знаный є шыроко серед лемківской громады. Поведе він тепер Осередок Культуры Ґміны Ґорлиці, котрый єст добрі фунґуючом локальном інституцийом, яка діє на хосен промоциі і розвитку не лем польской культуры, але тіж лемківской.
Роман Корбич знаный є предовшыткым як музик і єден з основателів Лемківского Фолькового Ансамблю «Серенча» з Ґорлиц. Дотля был інструктором Осередка Культуры Ґміны Ґорлиці. В своій діяльности занимал ся тіж такыма проєктами як духова оркєста Охотничой Протиогньовой Стражы в Домініковицях і Молодіжна Духова Оркєстра в Брунарах. Під його опіком діют так само і дальшы ансамблі, як «Мажореткі Доміно» і Фольклористичный Ансамбль «Бескіды» в Домініковицях.
Роман Корбич єст лавреатом дакількох нагорід, в тым популярной в ґорлицкым повіті нагороды «Мосты Старосты», яка єст признавана для осіб, орґанізаций і ансамблів, якы заслужыли ся свойом культурном діяльністю на обшыри ґорлицкой землі. В 2018 р. оцініня было признане і веденому Р. Корбичом ансамбльови «Серенча» за выдатны осягніня в творчій інтерпретациі лемківской культуры інспіруваній фольклором.
Корбич вычерял на станосику директора Осередка Культуры Ґміны Ґорлиці дотеперішню ведучу Ґражыну Яркєвич, яка одшыла по дволітній каденциі на пенсию.
фот. Осередок Культуры Ґміны Ґорлиці
Коментарі