Русиньска інформачна аґентура Рутенпрес одсвятковала 20 років

Як інформовала аґентура Рутенпрес, в пятніцю 15-го мая 2026-го року собі в просторах Інштітуту про културу войводиньскых Русинів в Новім Саді припомянули 20 років од основаня той аґентуры.

Новинарьско-інформачна аґентура Рутенпрес діє в рамках Новинарьско-выдавательской інштітуції Руске слово, котра выдає періодічну і неперіодічну пресу Русинів у Сербії. Із нагоды округлого юбілею Руске слово зорґанізовало округлый стіл.

Модератором вечора быв директор НВІ Руске слово Борис Варґа, і меджі діскутуючіма были бывшы і теперішні редакторкы Рутенпресу.

Бісідовало ся о минулости, сучасности і будучности аґентуры Рутенпрес, як і о вызвах, із котрыма стрічали ся їй оносвателі і редакторы од початку аж по днесь, але о тім, як ся міняють конзументы русиньскых медій під впливом модерных технолоґій і діґіталного світа.

Аґентура Рутенпрес є єдинов у світі русиньсков новинарьско-інформачнов аґентуров, котра фунґує денно, але так само є єдинов свойой сорты на языках народностных меншын в рамках Автономной покраїны Войводина і Сербії обще. Основана была 15-го мая 2006-го року.

Як інформовала аґентура, меджі гостями святочной події были представителі русиньскых інштітуцій, културны діятелі, інтелектуалы, як і люди, котры были заінтересованы данов темов.

Фото: Рутенпрес.