Русины Мадярьска припомянули собі Ференца Ракоція ІІ.

Як інформує сайт „Вcедepжaвного Русинського Caмoсправованя“ в Мадярьску, 2-го апріля 2016-го року у місті Шарошпоток в парку Музея Ракоція 450 Русинів праздновало 340-ту річніцю од дня народжіня князя Ференца Ракоція ІІ.

В Мадярьску быв у 2015-ім році день народжіня Ференца Ракоція ІІ. мадярьскым парламентом выголошеный за памятный день, чім ся, як ся пише на сайті, „підкріпило ниґда незагасаюче чувство честованя Русинами, gens fidelissima, памяти Великого Княза“. Як „gens fidelissima“ (найвірнішый народ) были Русины названы як раз Ференцом Ракоційом ІІ. Названя собі выслужыли за свою вірность, кідь в рр. 1703 – 1711 по боці Ракоція Русины войовали в неуспішнім бунті проти Габсбурґів. Тот быв у тім часі князьом Трансілванії і паном Мукачівского замку.

Свято Русинів зачало Святов літурґійов у Ґрекокатолицькій церькви свв. Петра і Павла, по котрій ся приговорив участным пріматор (мер) Шарошпотока Янош Арош. Тот підкреслив, як важне є припоминати собі Ракоція у жывоті міста. Віра Ґіріц, котра заступать Русинів Мадярьска в мадярьскім парламенті, інформовала участных о своїм выступі в парламенті почас пленарного засіданя, котре проходило 29-го марца 2016-го року і было присвячене споминаному юбілею. Далше в рамках проґраму іщі выступили директорка Музея Ракоція др. Едіт Томаш, на святочнім концерті обогатили подію школярі Основной школы Ференца Ракоція ІІ. і школярі Шарошпотоцькой школы уменя.

На закінчіня праздника выступали в парку каштеля, де ся Ракоцій народив, Янош Арош, пріматор міста, Віра Ґіріц, преставителька Русинів у мадярьскім парламенті, Віктор Крамаренко, председа „Вседержавного Русинського Самосправованя“ (ВРС), Ольґа Сілцер-Ліковіч і Янош Соноцкі, підпредседове ВРС, Янош Кожняньскый, председа „Общества Русинув/Рутенув Мадярщины“ і „Шарошпотокського Русинського Націоналного Самосправованя“, председа Ревізной комісії ВРС і директорка Музея Ракоція др. Едіт Томаш. Потім вєдно із множеством містных положыли вінці ку памнятнику Ференца Ракоція ІІ. і заспівала ся русиньску гімна.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА