Русины жадають зміну выбору на раду

У віторок, 21-го фебруара засідадав Выбор про народностны меншыны і етнічны ґрупы Рады влады Словацькой републікы. Выбор прияв в рамках свого засіданя ключову позіцію, котров жадать трансформацію того порадного орґану на окрему раду.

Трансформовати Выбор про народностны меншыны і етнічны ґрупы на Раду влады про народностны меншыны і етнічны ґрупы пропоновав Мілан Піліп, єден із двох представителів Русинів у выборі. Піліп то пропоновав на основі рішань, котры были прияты на засіданях Округлого стола Русинів Словеньска. Слідує ся тым зміцніня силы орґану, котрый має на старости проблематіку народностных меншын на Словакії. На приятя такой ключовой позіції было потрібне в голосованю здобыти 3/5 векшыну, што ся Піліпови і подарило. Председа выбору, котрым є уповномоченый про народностны меншыны і етнічны ґрупы Ласло Буковскый, так дістав од выбору повіріня, жебы зробити крокы напрямены ку трансформації выбору на раду.

О тій пропозіції про нашу редакцію высловив ся другый член выбору за Русинів, а єдночасно і нововыбратый председа Окроглого стола Русинів Словеньска – Ян Липиньскый, котрого сьме ся звідали, котры бы были основны зміны по транформації выбору на раду і в чім бы была рада а з ньов і позіція меншын в державі, котра дотеперь не має закон о народностных меншынах, міцнішы.

„Основнов різніцьов міджі тым, ці сьме выбором або радов влады, є в тім, же на челі рады влады не стоїть уповномоченый про народностны меншыны але член влады. То є велика выгода, бо член влады має досяг на найвысшу екзекутіву в державі, проблематіку меншын приносить рівно на засіданя влады. Правда, і рада бы зістала лем порадным орґаном, як є то і теперь в припаді выбору, але то, же на челі бы стояв підпредседа влады, котрый проблемы меншын може такой обговорити з цілов владов на їй засіданю, є барз важнов справов. Наконець, так тому было і колись, не жадаме нич нове,“ говорить Липиньскый.

Як далше інформовав, кідьже в минулости мав на старости меншыны підпредседа влады, Липиньскый і теперь видить ліпшу можливость в тім, жебы тоту аґенду не дістав дакотрый із міністрів, але новый підпредседа влады, котрый бы мав на старости лем народностны меншыны і етнічны ґрупы. В такім припаді зіставать вопрос, што із уповномоченым про народностны меншыны і етнічны ґрупы, котрого функція ся вытворила по зрушіню функції підпредседы влады. Липиньскый видить дві можливости.

„Є і можливость, жебы было даяке дуо – уповномоченый і підпредседа влады. Но скоріше то виджу так, же уповномоченый бы уж не быв, быв бы лем підпредседа влады про народностны меншыны, як тому было і даколи. Уповномоченый бы стратив смысел “

Про меншыны на Словакії буде тот рік важный. Як раз в році 2017 бы ся мав прияти закон о фонді про підпору културы народностных меншын, за правилами котрого бы ся мала вже од далшого рока мінити ціла сістема фінанцованя културы окремых державов вызнаных народностных меншын. Як раз член влады, котрый бы мав на старости меншыны, бы міг быти потрібным тлумачом, котрый бы коло приятя закона обговорив з владов і припомінкы меншын односно їх представы новой сістемы фінанцованя і перероздільованя грошей.

Жрідло фотоґрафій: Facebook – Rádio Patria – Štúdio Košice.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА