НОВИЙ САД (Сербія) Предсідатель Уряду Влады Войводины Боян Пайтич обіцял, што Покраіна (уряд Войводіны) фінансово підтримат будову Дому (Бурсы) для русиньскых школярів і студентів, котры ся вчат в Новым Саді.
Про тот проєкт радили премєр Пайтич, грекокатолицкій Апостольскій Еґзарха в Сербіі кир Георгій Джуджар і предсідатель Національного совіту Русинів Славко Рац. В часі бесіды предсідатель Совіту Русинів і кир Георгій передставили головны напрямы національной стратеґії Русинів, як тіж актуальну ситуацию Русинів і плян будучого інтернату. Премєр Пайтич повіл, же Власти Войводины міцно підтримают презентований проєкт, насампред фінансово. За його словамы, покля ся рішыт маєтково-правны вопросы маєтку грекокатолицкой церкви, котры детермінуют розпочатя будовы бурсы, премєр заанґажує ся жебы фонды на інвестицию будовы дому для русиньскых школярів і студентів нашли ся на списі пріорытетовых задач. Русиньска спільнота вказала єдніст коло ідеі будовы дому для школярів і студентів в Новым Саді. Є то добрий спосіб для маніфестациі національной ідентичности і зменшаня темпа асимілюваня ся младых, коли придут вчыти ся до вельикого осередка, што на жаль присутне є во вшыткых меншыновых спільнотах. Підтримуваня ідентичности, культуры і традиций вшыткых спільнот Войводины є медже природныма пріоритетамы крайовой влады. Вшелеяко підпорюваны будут такы проєкты котры, не лем будут хосенны русиньскій спільноті, але і як в тым припадку, буде то репрезентатывний обєкт і прикраска міста Новий Сад – гварил Боян Пайтич. /РутенпреС/
Коментарі