Што робит Малопольскє Воєвідство для Лемків? Звідали сме самого Маршалка

Як выглядат спілпраца Заряду Малопольского Воєвідства з нацийональныма і етнічныма меншынами, якы жыют в Малопольщы? Звідали сме самого Маршалка Воєвідства – Лукаша Смулку – вчас пресового сніданя, якє проходило 24. квітня/апріля 2025 р. в головным будинку Маршалківского Уряду в Кракові.

Пресове снідня, о котрым бесіда, было зорґанізуване в ціли представліня інвестицийных успіхів за першый рік урядуваня теперішніх власти, як і вказаня плянів діянь на текучый 2025 рік. На жаль, о культурі ци туристиці было барз мало повіджене, лем тото, што Воєвідство барз ся тішыт, же в 2024 році до Малопольщы приіхало 26 мілийонів туристів. А о плянах будовы новых доріг ци інчых інвестициях на обшыри Лемковины (значыт ґорлицкого і сандецкого повітів), практичні нич сме ся не дознали. Мали сме вражыня, же Воєвідство звертат найбільшу увагу на Краків і сусідні з ним повіты, іґноруючы барже оддалене од столиці реґіоны.

При нагоді сніданя, скорыстали сме і побесідували сме коротко з Маршалком. Звідали сме, як докладні выглядат кооперация власти воєвідства з етнічныма і нацийональныма меншынами. Так ся на тоту тему выповіл маршалок Лукаш Смулка:

Як іде о спілпрацу з той перспективы, то не можу ся в ничым винити. Ведеме діалоґ з ріжныма середовисками, примірно в обшыри опікы над забытковыма обєктами. Вшытко зато, жебы каждый жыючый в Малопольщы чул підпору Заряду Малопольского Воєвідства. Кєд іде о новы проєкты, то меншыны тіж можут такы реализувати, беручы до увагы шыроко пониманый діалоґ.

Заінтересувала нас тіж інча тема, о котру звідали сме Маршалка. Ци буде реализуваный окремый ґрантовый конкурс лем для меншыновых орґанзаций? Як сме почули, тота оферта ґрантів воєвідства єст уж достаточна і меншыны можут сміло аплікувати на вельо способів. Пресове сніданя далекє было од невыгідных тем. Журналисты з інчых радийовых і телевізийных редакций давали звіданя з обшыри безпечных тем, а атмосфера стрічы была гречна і жычлива. Ци підеме на наступну подібну подію зас звідувати о нашы права? Можливе. Вкінци, капля воды камін точыт.