Схвалили штатут Рады влады СР про народностны меншыны

Компетенції і аґенду дотеперішнього Выбору про народностны меншыны і етнічны ґрупы, котрый належав під Раду влады Словацькой републікы про людьскы права, народностны меншыны і родову рівность, возьме під себе по новому Рада влады Словацькой републікы про народностны меншыны.

Выходить то із штатуту рады, якый управлює їй задачі і компетенції як окремого фахового орґану влады. Штатут рады схвалила словацька влада на своїм засіданю в середу 30-го октобра 2024-го року.

Высшый орґан про меншыны

Рада влады СР про народностны меншыны є высшым меншыновым орґаном як дотеперішній народностный выбор, кедьже тот быв порадным орґаном Рады влады Словацькой републікы про людьскы права, народностны меншыны і родову рівность, яка была порадным орґаном влады.

Нова народсностна рада буде прямо порадным орґаном словацькой влады. Подля штатуту буде повнити функцію конзултатівного орґану при забезпечованю участи членів народностных меншын, буде діяти як постоянный фаховый орґан про область імплементації Европской харты реґіоналных або меншыновых языків.

Так само має рада брати участи на коордінації публічных політік, концепцій і стратеґій державы в области прав народностных меншын.

Председом рады є премєр

Рада в рамках свого складу має председу рады, підпредседу рады, палату народностных меншын, представителів рады за централны орґаны державной справы і постоянных членів рады без права голосовати.

Председом народностной рады є председа влады Словацькой републікы. Посада підпредседы є про уповномоченого влады СР про народностны меншыны. В повязаню з тым змінив ся і штатут уповномоченого.

Влада створіньом окремой Рады влады СР про народностны меншыны сповнила обіцяня, котре авізовав премєр Роберт Фіцо на кінцю марца, коли владный кабінет розшырив компетенції уповномоченого про народностны меншыны.

Дві важны зміны

В штатуті новой рады можеме видіти дві важны зміны. По перше, мадярьска меншына буде мати сім членів рады, дотеперь у народностнім выборі мала пять членів. Тоту зміну просадив уповномоченый, котрого уряд мав задачу приготовити штатут рады.

Решті народностных меншын зістало єднаке чісло членів, яке мали в рамках народностного выбору. Значіть, Ромове мають в раді штирьох, Русины трьох, Чехы і Українці по двоє членів. Решта народностных меншын має по єднім членови.

По друге, в шатуті рады ся пише, же председа рады подля потребы скликує засіданя мінімално двараз за рік. Дотеперь было засіданя выбору скликоване штирираз за рік. Штатут припустив і міморядны засіданя рады, котры є председа рады повинный скликати до 15-ох днів, але то лем в тім припаді, же му буде доручена жадость од найменше єдной третины вшыткых членів з правом голосовати.

Зато буде вопросом практікы, як реално буде нова рада вырішовати вшытку народностну аґенду, котра была розділена у выборі на штири засіданя, хоць є статус меншынового орґану теперь на высшій уровни.