Словацька влада схвалила представителя Ґуралів у народностній раді

В Палаті народностных меншын, котра є частьов Рады влады Словацькой републікы про народностны меншыны, буде мати єдного представителя і ґуральска народностна меншына.

Выходить то із зміны і доповніня штатуту Рады, котры в середу 23-го апріля 2025-го року схвалила словацька влада. Інформовала о тім аґентура TASR.

„Цільом є промітнути вызнаня ґуральской комуніты жыючой в Словацькій републіці за народностну меншыну зачленіньом їй представителя до Рады влады СР про народностны меншыны,“ арґументовав доповніня штатуту председа влады Словацькой републікы Роберт Фіцо, котрый передкладав пропозіцію. Премєр є подля штатуту і председом народностной рады.

В штатуті той рады так само управили ся пункты повязаны із представліньом народностных меншын в Раді. „Заміром є прецізовати дакотры установліня в інтересі звекшіня їх єднозначности і ефектівности реалізації,“ арґументує передкладатель.

Припоминаме, же Рада влады Словацькой републікы про народностны меншыны як окремый порадный орґан владного кабінету выникнув дефінітівно схваліньом їй штатуту на кінцю октобра 2024-го року. Попередником того орґану быв Выбор про народностны меншыны і етнічны ґрупы, котрый належав під Раду влады Словацькой републікы про людьскы права, народностны меншыны і родову рівность.

Рада надвязує на роботу Выбору, повнить функцію конзултатівного орґану при коордінації публічных політік і забезпечованю участи членів народностных меншын на вырішованю діл, котры ся народностных меншын дотуляють. Так само є постоянным фаховым орґаном про область імплементації Европской харты реґіоналных або меншыновых языків.

Перше засіданя Рады влады Словацькой републікы про народностны меншыны одбыло ся на кінцю януара того року. Участны втогды были коопотваны представителі меншын із попереднього меншынового выбору.

У фебруарі того року проходили вольбы, в котрых собі окремы народностны меншыны посередництвом своїх орґанізацій, якы зареґістровали ся на вольбы, выбрали на штирирічный функчный період своїх новых представителів.

Мадяры мають в даній раді сім членів. Ромове мають штирьох, Русины трьох, Українці і Чехы по двоє членів, решта надодностных меншын має по єднім представительови.

„Днесь завершыв ся процес вызнаня Ґуралів за народностну меншыну,“ інформовав на офіціалнім сайті на сіті Facebook уповномоченый влады СР про народностны меншыны Акош Горонь.

„В януарі Ґуралі стали 15-ов народностнов меншынов на Словакії, але на просаджіня конштітуційов ґарантованых прав потрібны суть далшы крокы. Влада днешнім рішіньом змінила штатут Рады влады про народностны меншыны, і встановила представителя про нашу найновішу народностну меншыну,“ продовжує Горонь з тым, же в куртім часі выголосить доповнюючі вольбы про представителя за ґуральску меншыну до Рады влады СР про народностны меншыны.